Yanvar ayında ölkə ərazisində havanın orta aylıq temperaturunun iqlim normasına yaxın və bir qədər aşağı olacağı gözlənilir.
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyevin APA-ya verdiyi məlumata görə, aylıq yağıntının miqdarının iqlim normasına yaxın, bəzi yerlərdə isə bir qədər çox olacağı ehtimal olunur. Ayın birinci ongünlüyündə havanın temperaturu iqlim normasına yaxın, ikinci və üçüncü ongünlüyün bəzi günlərində isə normadan bir qədər aşağı olacaq.
Bakı və Abşeron yarımadasında orta aylıq temperaturun 2-5 dərəcə isti olacağı gözlənilir ki, bu da iqlim normasına yaxın və bir qədər aşağıdır. Gecələr havanın temperaturu 1-3 dərəcə isti, ayrı-ayrı günlərdə 2-7 dərəcə şaxta təşkil edəcək, gündüzlər temperatur 5-10, birinci ongünlüyün birinci yarısında 12 dərəcəyədək isti olacaq. Bəzi günlərdə isə havanın temperaturu 2 dərəcə şaxtadan 3 dərəcəyədək isti gözlənilir. Aylıq yağıntının miqdarı iqlim normasına yaxın, bəzi yerlərdə (norma 18-28 mm) isə normadan bir qədər çox olacaq.
Naxçıvan Muxtar Respublikasında orta aylıq temperaturun 2-6 dərəcə şaxta təşkil edəcəyi gözlənilir ki, bu da iqlim normasına yaxın və bir qədər aşağıdır. Gecələr havanın temperaturu 8-13 dərəcə şaxta, ayrı-ayrı günlərdə 20-25 dərəcə şaxta təşkil edəcək. Gündüzlər temperatur 3 dərəcə şaxtadan 2 dərəcəyədək isti, bəzi günlərdə 5-10 dərəcə şaxta olacaq. Aylıq yağıntının miqdarının iqlim normasına yaxın (norma 14-25 mm) olacağı proqnozlaşdırılır.
Yuxarı Qarabağ: Xankəndi, Şuşa, Xocalı, Xocavənd; Qubadlı, Zəngilan, Laçın, Kəlbəcər və Daşkəsən, Gədəbəy rayonlarında orta aylıq temperaturun 1-4 dərəcə şaxta gözlənilir ki, bu da iqlim normasına yaxın və bir qədər aşağıdır. Gecələr temperatur 3-8, bəzi günlərdə 15-20 dərəcə şaxta təşkil edəcək. Gündüzlər isə havanın temperaturu 2 dərəcə şaxtadan 3 dərəcəyədək isti, bəzi günlərdə 5-8 dərəcə şaxta təşkil edəcək. Aylıq yağıntının miqdarı iqlim normasına yaxın, bəzi yerlərdə (norma 16-24 mm) isə normadan bir qədər çox olacaq.
Qazax-Gəncə, Goranboy, Tərtər-Ağdam-Ağcabədi-Füzuli-Cəbrayıl rayonlarında havanın orta aylıq temperaturu 2 dərəcə şaxtadan 3 dərəcəyədək isti olacaq, bu da iqlim normasına yaxın və bir qədər aşağıdır. Gecələr temperatur 2-4, bəzi günlərdə 8-13 dərəcə şaxta təşkil edəcək. Gündüzlər isə 2-7 dərəcə isti, bəzi günlərdə 3-7 dərəcə şaxta gözlənilir. Aylıq yağıntının miqdarı iqlim normasına yaxın, bəzi yerlərdə (norma 10-32 mm) isə normadan bir qədər çox olacaq.
Balakən, Zaqatala, Qax, Şəki, Oğuz, Qəbələ, İsmayıllı, Ağsu, Şamaxı, Siyəzən, Şabran, Xızı, Quba, Xaçmaz, Qusar rayonlarında havanın orta aylıq temperaturu 0-4 dərəcə şaxta təşkil edəcək ki, bu da iqlim normasına yaxın və bir qədər aşağıdır. Gecələr temperatur 2-7 dərəcə, bəzi günlərdə 15-20 dərəcə şaxta olacaq, gündüzlər isə 1-6 dərəcə isti, bəzi günlərdə 3-8 dərəcə şaxta gözlənilir. Aylıq yağıntının miqdarı iqlim normasına yaxın, bəzi yerlərdə (norma 22-49 mm) isə normadan bir qədər çox olacaq.
Mərkəzi-Aran: Ağdaş, Mingəçevir, Yevlax, Kürdəmir, İmişli, Beyləqan, Sabirabad, Biləsuvar, Saatlı, Şirvan, Hacıqabul, Salyan, Neftçala rayonlarında orta aylıq temperatur 1 dərəcə şaxtadan 4 dərəcəyədək isti olacağı gözlənilir ki, bu da iqlim normasına yaxın və bir qədər aşağıdır. Gecələr temperatur 3 dərəcə şaxtadan 2 dərəcəyədək isti, bəzi günlərdə 5-10 dərəcə şaxta təşkil edəcək. Gündüzlər havanın temperaturu 6-11 dərəcə isti, bəzi günlərdə 0-4 dərəcə şaxta olacaq. Aylıq yağıntının miqdarının iqlim normasına yaxın, bəzi yerlərdə (norma 17-30 mm) isə normadan bir qədər çox olacağı proqnozlaşdırılır.
Masallı-Lənkəran-Astara-Lerik, Yardımlı rayonlarında havanın orta aylıq temperaturu 0-2 dərəcə isti təşkil edəcək ki, bu da iqlim normasına yaxın və bir qədər aşağıdır. Gecələr temperaturunun 4 dərəcə şaxtadan 1 dərəcəyədək isti, bəzi günlərdə 6-9 dərəcə şaxta, gündüzlər isə 5-10 dərəcə isti, bəzi günlərdə 0-4 dərəcə şaxta olacağı gözlənilir. Aylıq yağıntının miqdarının iqlim normasına yaxın, (norma 63-98 mm) bəzi yerlərdə isə bir qədər çox olacağı proqnozlaşdırılır.

Tehsil-press.az