Bu gün Təzə Pir məscidində cümə namazı zamanı kütləvi dava olub.
Cümə namazında iştirak edən şəxslərin BakuPost.az-a verdiyi məlumata görə, hadisəyə səbəb məscidə ağ geyimli 2 şəxsin daxil olaraq, axundun xütbəsini kəsmək istəməsi olub. Hadisə şahidlərinin sözlərinə görə, namazdan əvvəl məscidə əynində kəfəni xatırladan ağ geyimli Yaşar adlı bir yaşlı kişi və bir gənc gəlib. Onun əlində qılınc olub. O, cümə namazından əvvəl söz alıb danışmaq istəyib, lakin məsciddəkilərin narazılığı ilə üzləşib və susdurulub. Daha sonra namaz qılınıb. Namazdan sonra Yaşar adlı şəxs yenidən nəsə danışmaq istəyib. Bu zaman möminlər onun üzərinə hücum çəkərək, döyməyə başlayıblar.
Yaşar şahidlərdən biri ilə söhbəti zamanı ona Allah tərəfindən vəhy verildiyini, 2 ildir ki, bunu möminlərə çatdırmaq istədiyini qeyd edib.
26-cı Polis Bölməsinin əməkdaşları həmin şəxləri - Yaşar Əliqulu oğlu Cahangirov və Əfqan Elman oğlu Aydınovu saxlayıblar. Həmin şəxslər istintaqa təhvil veriliblər.
Hazırda faktla bağlı araşdırma aparılır.
Qeyd edək ki, əli qılınclı şəxs Yaşar Cahangirovun xəbərə əlavə edilən fotosu 2013-cü ildə "Qafqazinfo"nun əməkdaşı tərəfindən Dənizkənarı Milli Parkda çəkilib. Həmin vaxt da o, qeyri-adekvat hərəkətləri ilə vətəndaşların diqqətini çəkibmiş.



Təhsil-press.az