ANS-in Gəncə bürosunun əməkdaşı Ermənistan silahlı qüvvələrinin yerləşdiyi postdan 150 metr aralıda yerləşən Qazaxın Quşçu Ayrım kəndində müşahidələr aparıb.

Tehsil-press.az xəbər verir ki, kənd sakinləri bildirir ki, intensiv atışma olmasa da, qarşı tərəfin arabir atəşkəsi pozması kənddə yerləşən evlərdə dağıntılara səbəb olur. Qazax rayonunun cəbhə xəttinə ən yaxın kəndi olan Quşçu Ayrım eyni zamanda rayonun sonuncu yaşayış massividir. Buradan sonra isə hərbçilər və işğal olunmuş Azərbaycan kəndləri yerləşir.
Sakinlərin sözlərinə görə, kənd hər 3 tərəfdən Ermənistan hərbi birləşmələrinin nəzarəti altındadır. Bu da öz növbəsində kənd sakinlərinin həyatını birbaşa təhlükə altına atır. Gecə olsa da, çox açıq yerdə müsahibə almaq belə təhlükə yarada bilər.
Düzdür son vaxtlar intensiv atışma qeydə alınmasa da Quşçu Ayrımda yaşayanlar qarşı tərəfin istədiyi vaxt atəş açdığını bildirirlər. Ermənistan postundan 150 metr məsafədə yerləşən kəndin əkin və örüş sahələri də işğal altındadır.
"Ermənilər demək olar ki, hər gecə atırlar. Amma buna baxmayaraq kimsə evini tərk etmir", - kən sakini Əvəz Ağamalıyev dedi.
"Mal-qaramızı otara bilmirik. Ermənilər tutub oraları, gecəsi də gündüzü də təhlükəlidir", - kənd sakini İmamqulu Əhmədov bildirdi.
"Burada min nəfərdən artıq sakin yaşayır. Ermənilər atəşi pozurlar, narahatçılıq yaradırlar", - İcra nünmayəndəsi Elmaz Nəsibov bildirdi.
Atəş səsi eşidilən zaman ən çox həyacan keçirən körpələr olur. Buna görə də gecə olanda valideyinlər azyaşlıları evin daha təhlükəsiz otağında yatızdırırlar.
"Ermənilər atəş açan kimi uşağa dəyməsin deyə qaçıb içəri giririk", - kənd sakini Mehri Namazova dedi.
Kənddə elə bir ev yoxdur ki, onun üzərində güllə izi olmasın. Qarşı tərəf mülki şəxsin evini, həyətini və həyatını hədəfə alır. Xoşbəxtlikdən biz çəkiliş apardığımız gecə insidentsiz başa çatdı. Bu sevindirici olsa da növbəti gecə nələrin baş verə biləcəyi məlum deyil.

tehsil-press.az