Sabunçu Gənclər Evinin təşkilatçılığı ilə “Azərbaycan universitetlərinə virtual infotur” layihəsi davam edir. Layihə çərçivəsində Bakı Dövlət Universitetinin (BDU) onlayn təqdimatı keçirilib.
Sabunçu Gənclər Evinin “Facebook” səhifəsindən və “YouTube” kanalından canlı yayımlanan təqdimat sosial şəbəkə üzərindən 1987 nəfərə çatıb, 522 nəfər canlı izləyib. Virtual infotur müddətində BDU-nun Tədrisin təşkili və təlim texnologiyaları üzrə prorektoru İradə Əliyeva və digər universitet nümayəndələri gəncləri maraqlandıran sualları cavablandırıblar. Gənclər ali təhsil müəssisəsinə virtual infotur müddətində universitet və onun yaratdığı imkanlarla yaxından tanış olublar.
Qeyd edək ki, “Azərbaycan universitetlərinə virtual infotur” layihəsinin keçirilməsində məqsəd abituriyentlərə ixtisas və universitet seçimlərində kömək göstərmək, onların rəqəmsal texnologiyanın imkanları daxilində universitet nümayəndələri vasitəsilə öz suallarına cavab tapmağına şərait yaratmaq, ali təhsil müəssisələrinin ixtisaslaşdığı istiqamətlər üzrə tələbələr üçün yaratdığı şərait və imkanları abituriyentlərə təqdim etməkdir.
İyunun 30-dək davam edəcək layihə Bakı Şəhəri üzrə Təhsil İdarəsi və Gənclərin İnkişaf və Karyera Mərkəzinin dəstəyi ilə Sabunçu Gənclər Evi tərəfindən həyata keçirilir. İmtahan verəcək gənclər Sabunçu Gənclər Evinin sosial şəbəkə səhifələrini izləyərək təqdimat tarixlərindən informasiya əldə edə bilərlər. Sabunçu Gənclər Evi Gənclər və İdman Nazirliyinin nəzdində fəaliyyət göstərən sosial xidmət müəssisəsidir.

Tehsil-press.az