Son on il ərzində Sumqayıt şəhəri Azərbaycanın ən sürətlə inkişaf edən sənaye və iqtisadi mərkəzlərindən birinə çevrilib. Rəsmi göstəricilər 2015–2025-ci illər ərzində şəhərin sosial-iqtisadi həyatında mühüm irəliləyişlərin əldə olunduğunu təsdiqləyir.

2025-ci ildə şəhərin ümumi məhsul buraxılışının həcmi 2015-ci illə müqayisədə 6 dəfə artaraq 850 milyon manatdan 5 milyard 100 milyon manata çatıb. Bu rəqəm Sumqayıtın ölkə iqtisadiyyatındakı mövqeyinin ildən-ilə daha da gücləndiyini göstərir.

Sənaye məhsulunun həcmi son 10 ildə 8 dəfə artıb. Belə ki, əgər 2015-ci ildə sənaye məhsulunun həcmi 500 milyon manat idisə, 2025-ci ildə bu göstərici 4 milyard manata çatıb.

Bu dövr ərzində işçilərin sosial rifahında da mühüm dəyişikliklər baş verib. 2015-ci ildə orta aylıq əməkhaqqı 400 manat olduğu halda, 2025-ci ildə bu məbləğ 850 manata qədər artıb.

Şəhərin iqtisadi inkişafında əsas kapitala yönəldilən vəsait mühüm rol oynayıb. 2015-ci ildə bu sahəyə yatırılan investisiyaların həcmi 140 milyon manat idisə, 2025-ci ildə bu rəqəm 420 milyon manata çataraq üç dəfə artıb.

2015-ci ildə şəhər əhalisi 336 min nəfər olduğu halda, 2025-ci ildə bu göstərici 428 min nəfərə yüksəlib. Əhalinin artımı ilə yanaşı, məşğulluq imkanları da genişlənib. 2015-ci ildə 100 min nəfər məşğul olduğu halda, bu rəqəm 2025-ci ildə 190 min nəfərə çatıb.

Son on ildə Sumqayıtda fəaliyyət göstərən sənaye müəssisələrinin sayı da əhəmiyyətli dərəcədə çoxalıb. 2015-ci ildə 124 müəssisə fəaliyyət göstərirdisə, 2025-ci ildə bu rəqəm 327-yə çatıb. Bu dövrdə 203 yeni müəssisə yaradılıb.
Şəhər əhalisinin hər bir nəfərinə düşən gəlir 2015-ci ildə 3400 manat idisə, 2025-ci ildə 5600 manata çataraq 1,6 dəfə artıb.

2015–2025-ci illərin müqayisəli təhlili göstərir ki, Sumqayıt şəhəri sosial-iqtisadi göstəricilərə görə misilsiz inkişaf yolu keçib. İstehsal həcminin, məşğulluğun, əhalinin gəlirlərinin və investisiya axınının artması şəhərin Azərbaycanın sənaye paytaxtı statusunu daha da möhkəmləndirib.

Tehsil-press.az