Müstəqil Dövlətlər Birliyi (MDB) Parlamentlərarası Assambleyasının daimi komissiyalarının iclaslarında iştirak etmək üçün Azərbaycanın bir qrup deputatı aprelin 13-də Rusiyanın Sankt-Peterburq şəhərinə səfər edəcək.

Milli Məclisin mətbuat xidmətindən Trend-ə verilən məlumata görə, parlamentin Regional məsələlər komitəsinin sədri Arif Rəhimzadə qurumun Sosial siyasət və insan hüquqları daimi komissiyasının iclasında iştirak edəcək. O bu komissiyanın sədri qismində iclası açaraq, gündəlikdəki məsələlər barədə məlumat verəcək. A.Rəhimzadə, eyni zamanda MDB-nin 2016-2020-ci illər üzrə perspektiv model qanunvericilik planına təkliflər barədə və MDB PA-nın Sosial siyasət və insan hüquqları daimi komissiyasının təşəbbüsü ilə qurum tərəfindən qəbul olunmuş model qanunvericilik aktlarından istifadə edilməsi ilə bağlı məruzələrlə çıxış edəcək. Tədbirdə həmçinin, "Tibbi sığorta haqqında" model qanun layihəsinə baxılacaq.
Deputatlar Rüstəm Xəlilov və Malik Həsənov İqtisadiyyat və maliyyə məsələləri daimi komissiyasının yığıncağında iştirak edəcəklər. Tədbirdə "Publik-fərdi tərəfdaşlıq haqqında", "Xarici ticarət fəaliyyətinin tənzimlənməsi haqqında", "Qiymətqoymanın dövlət tərəfindən tənzimlənməsi barədə" model qanunların, Kosmik məkanın dinc məqsədlərlə öyrənilməsi və istifadə edilməsi sahəsində əməkdaşlığa dair MDB Konvensiyasının layihələri müzakirə olunacaq.
Millət vəkili Bəxtiyar Əliyev qurumun Elm və təhsil üzrə daimi komissiyasının iclasına qatılacaq. İclasın gündəliyinə "Böyüklərin təhsili haqqında", "Ekspertiza və ekspert fəaliyyəti barədə", "İnnovasiya məhsullarının hazırlanması, istehsalı üzrə birgə araşdırmalar və əməkdaşlıqla bağlı" model qanun layihələri və digər məsələlər daxil edilib. Səfər aprelin 15-də başa çatacaq.

tehsil-press.az