Uyğunsuzluq dərmanların içlik vərəqəsi və ya qablaşdırma ilə bağlı olub."Son on gün ərzində 110 addan çox dərman vasitəsinin ölkəyə idxalı zamanı içlik vərəqəsi və ya qablaşdırma ilə bağlı uyğunsuzluqların olduğu aşkar edilib". Tehsil-press.az-ın məlumatına görə, bu barədə Səhiyyə Nazirliyi Analitik Ekspertiza Mərkəzinin toplantısında məlumat verilib.
Mərkəzin direktoru Murad Süleymanovun sözlərinə görə, sözügedən nöqsanlar əsasən dərman vasitəsinin qablaşdırmasının dövlət qeydiyyatından keçən formaya, içlik vərəqəsinin isə Səhiyyə Nazirliyinin təsdiqlədiyi formaya uyğunsuzluğu, bəzi hallarda içlik vərəqəsində əks olunan məlumatların Azərbaycan dilində deyil digər dillərdə olması ilə əlaqədar olub.
O həmçinin bildirib ki, dərmanların keyfiyyətinə nəzarət gücləndirilib, bu sahədə olan tələblər sərtləşdirilib. Mərkəzin fəaliyyəti Səhiyyə Nazirliyi, İqtisadiyyat Nazirliyi, Dövlət Gömrük Komitəsi, Tarif Şurası və digər aidiyyəti dövlət qurumları və özəl təşkilatlarla sıx əlaqəli şəkildə qurulub.
M.Süleymanov qeyd edib ki, qanunvericiliyə görə içlik vərəqəsində göstərilməli olan məlumatların ardıcıllığı nəzərə alınaraq içlik vərəqəsinin nümunəsi hazırlanıb. Nümunələr 13 iyundan istifadəyə verilib.
Murad Süleymanov - Səhiyyə Nazirliyinin Analitik Ekspertiza Mərkəzinin rəhbəri
Toplantıda respublikada fəaliyyət göstərən dərman vasitələrinin istehsalçılarının yerli nümayəndəliklərinin, distribütor şirkətlərinin və topdansatış müəssisələrinin nümayəndələri, həmçinin mərkəzin aidiyyəti şöbələrinin mütəxəssisləri də olmaqla ümumilikdə 60-a yaxın şəxsin iştirak etdiyi iclasda hazırda dərman vasitələrinin ölkəyə idxalı zamanı içlik vərəqələri və qablaşdırma ilə bağlı yaranan problemlər müzakirə olunub.
Tehsil-press.az
