Turizm və Sosial Xidmətlər üzrə Bakı Dövlət Peşə Təhsil Mərkəzi mühafizəçi ixtisası üzrə qısamüddətli təlimə müraciət qəbul edir.
Təlim iştirakçıları Azərbaycan qanunvericiliyi, tibbi, psixoloji və texniki hazırlıq, yanğınsöndürmənin əsasları üzrə intensiv dərslərə cəlb olunacaq.
Təlimə 20 yaşdan yuxarı hərbi xidmət keçmiş, (qadınlar və qanuni əsaslarla müddətli həqiqi hərbi xidmətə çağırışdan möhlət hüququ olanlar və azad edilənlər istisna olmaqla), məhkumluğu olmayan, fiziki cəhətdən sağlam, minimum orta təhsilli şəxslər müraciət edə bilərlər. Təhlükəsizlik sahəsində təcrübənin olması üstünlük hesab olunur.
Seçim prosesi ərizə qəbulu, müsahibə və tələb edilən sənədlərin qəbulu mərhələlərindən ibarətdir.
Son mərhələdə seçilmiş şəxslərdən aşağıdakı sənədlər tələb ediləcək:
- sağlamlıq haqqında arayış;
- məhkumluq haqqında arayış;
- hərbi xidmətdə olduğuna dair təsdiqedici sənəd (qadınlar və qanuni əsaslarla müddətli həqiqi hərbi xidmətə çağırışdan möhlət hüququ olanlar və azad edilənlər təsdiqedici sənəd təqdim etməlidirlər).
Turizm və Sosial Xidmətlər üzrə Bakı Dövlət Peşə Təhsil Mərkəzinin nəzdində yerləşən Bakı Mühafizə Məktəbində keçiriləcək təlim bir ay davam edəcək. Təlimi müvəffəqiyyətlə bitirən hər bir iştirakçı sertifikat alacaq.
Təlimə qoşulmaq üçün müraciətlər noyabrın 30-dək qəbul olunur.

Tehsil-press.az