Portuqaliyanın paytaxtı Lissabonda 8-ci illik texnologiya konfransı - “Web Summit” öz işini başa vurub.Tədbirdə 70 min nəfər iştirak edib, təqribən 2600 startap təqdim olunub.
“Web Summit”in yaradıcısı Peddi Kosqreyv İsrail-Fələstin münaqişəsi ilə bağlı şərhlərinə görə ötən ay Baş direktor vəzifəsini tərk edib. “Web Summit” onun yerinə “Wikimedia Foundation”in sabiq Baş direktoru Ketrin Maheri təyin edib.
Sammitin son günündə “Microsoft” şirkətinin dayanıqlı inkişaf şöbəsinin rəhbəri Melani Nakaqava Şimali Amerika şirkətinin bütün dünyada fermerlərə göstərdiyi köməkdən söhbət açıb.
“Süni intellekt aşağı karbonlu materiallar, bərpaolunan enerjinin istehsalı və saxlanması, eləcə də iqlim baxımından davamlı bitkilər kimi dayanıqlı inkişaf həllərinin işlənib hazırlanmasını sürətləndirə bilər. Ərzaq məhsullarının istehsalını yaxın illərdə əhəmiyyətli dərəcədə artırmaq lazım gələcək. Məsələn, 2050-ci ilədək biz istehsalı iki dəfə artırmalıyıq və süni intellekt bunu dayanıqlı şəkildə həyata keçirməyə kömək edəcək. Eyni zamanda, suyun miqdarı və torpaqlar azalır ki, bu da ciddi problemdir. Biz artıq “Microsoft”da bütün dünya üzrə fermerlərlə işləyirik. Ərzaq məhsullarının istehsalına gəlincə, biz qlobal fövqəladə vəziyyətdəyik. Süni intellekt fermaların məhsuldarlığını artırmağa qadirdir”, - deyən M.Nakaqava gələcəyin fermasını yaratmağa imkan verən “Microsoft Farm Vibes” proqramını misal çəkib.
Kənd təsərrüfatı torpaqdan istifadənin deqradasiyası və meşələrin qırılması kimi iqlim dəyişmələrinin ən iri amillərindən biridir. Lakin kənd təsərrüfatı iqlim dəyişmələrindən daha çox əziyyət çəkən sahələr siyahısına da aiddir. Fermerlər hava şəraitindən, o cümlədən qızmar istilər, daşqınlar və s. kimi gözlənilməz hava şəraitindən asılıdırlar. Burada “Farm Vibes” köməyə gəlir. “Microsoft”un məlumatına görə, texnologiya torpağın nəmliyindən asılı olaraq, toxumların əkilməsinin düzgün dərinliyini müəyyənləşdirməyə kömək edir və müxtəlif bitkilərin tarlanın qidalandırıcı maddələrini tükətməməsi barədə fermeri məlumatlandırır.
Tehsil-press.az
