Böyük Britaniyanın təhlükəsizlik üzrə nüfuzlu araşdırma mərkəzi RUSI Ukrayna Silahlı Qüvvələrinin 2023-cü il əks-hücum əməliyyatının uğursuzluğunun əsas səbəblərini müəyyən edən və yaxın gələcəkdə yeni hücumla bağlı şübhələr yaradan “2022-2023-cü illərdə Ukraynanın hücum əməliyyatlarından ilkin dərslər” adlı 48 səhifəlik hesabat dərc edib. Hesabatdan çıxarışları BBC nəşri yayımlayıb.“Müəlliflər ilkin planı əsaslı adlandırırlar: Ukraynanın 12 zirehli və mexanikləşdirilmiş briqadası 30 km enində ərazidə sıçrayış etməli, Tokmakı yeddi gün təcrid etməli, sonra cənubdan keçərək Melitopola yaxınlaşmalı idi. Belə olan halda Rusiyanın ehtiyatları artırmağa vaxtı olmayacaq və irəliləyən Ukrayna qoşunlarına müdafiədə yalnız altı RF alayının müqavimətini dəf etmək kifayət edəcəkdi”, - deyə hesabatda bildirilir.
Lakin hesabat müəlliflərinin qeyd etdiyi kimi, bu planın həyata keçirilməsinə həm Ukraynanın müttəfiqləri, həm də Ukrayna komandanlığının yol verdiyi səhvlər mane olub. Xüsusilə: Qərb müttəfiqləri kifayət qədər texnika və silah vermirdilər; Rusiyadan fərqli olaraq, Qərb ölkələri sənayenin hərbiləşdirilməsinə gecikmişdi, buna görə də Ukraynanın kifayət qədər silahı yox idi və onlar gec çatdırıldı. Bu, Ukrayna ordusunun yeni texnikanı mənimsəməyə az vaxtının olmasına səbəb oldu.
Bununla belə, Ukrayna komandanlığı daha az təlim keçmiş bölmələri hücuma atmağa qərarına gəldi, daha təcrübəli olanlar isə cəbhəni saxlamalı idi. Bundan əlavə, Ukrayna komandanlığı qüvvələrini bir neçə istiqamətə dağıtmalı oldu.
Analitiklərin fikrincə, Ukrayna komandanlığının ən ciddi səhvi, Rusiya qoşunlarının 2022-ci ildə Xarkovda olduğu kimi dözməyib qaçacaqlarına ümid etməsidir. Bu baş vermədikdə isə, Ukrayna Silahlı Qüvvələri ümidsizcə sürətini itirdi.
Bundan əlavə, Rusiya komandanlığı əsas hücumun istiqamətinin harada olacağını dəqiq bilirdi. Müəlliflər bunu həm Ukrayna, həm də onun müttəfiqləri tərəfindən əməliyyat təhlükəsizliyinin uğursuzluğu kimi qiymətləndirirlər.
Müəlliflər Rusiyanın mina sahələrinin sıxlığı və zirehli texnikaları böyük dəqiqliklə vura bilən hücum dronlarının imkanları kimi müzakirə olunan amillərə toxunmurlar.
Hesabat müəllifləri həmçinin iddia edirlər ki, yaxın gələcəkdə Ukraynanın hücum hərəkətlərinin bərpası mümkün deyil. Eyni zamanda, hesabatda deyilir ki, Ukrayna Rusiya ordusuna maksimum zərər vurmağa, eləcə də Rusiya büdcəsinə gəlir gətirən Rusiya infrastrukturuna hücumları artırmağa diqqət yetirə bilər.
Tehsil-press.az
