Azərbaycan Dövlət İqtisad Universitetinin (UNEC) Beynəlxalq İqtisadiyyat Məktəbinə yüksək balla qəbul olunanların sayı artıb.

UNEC-in Marketinq və Kommunikasiya Departamenti, İctimaiyyətlə Əlaqələr Şöbəsindən Tehsil-press.az-a verilən məlumata görə, tədrisi ingilis dilində aparılan fakültəyə bu il nəzərdə tutulan 170 plan yerinə qəbul olunan tələbələr 600 və daha çox bal toplayıb. Bununla da Beynəlxalq İqtisadiyyat Məktəbinə minimal keçid balında yüksəliş qeydə alınıb. 2014-cü ildə bu göstərici 427, 2015-ci ildə isə 375 olub.

2016/17-ci tədris ilinin nəticələrinə əsasən, Beynəlxalq İqtisadiyyat Məktəbində orta keçid balı maksimum həddə çataraq, 635 olub. Bu göstərici 2014-cü ildə 560, 2015-ci ildə isə 539 bal olub.
Qeyd edək ki, 600-dən çox bal toplayaraq UNEC-ə qəbul olunan 291 tələbədən 71%-i (170 tələbə) Beynəlxalq İqtisadiyyat Məktəbini seçib.
Tələbələr UNEC-in Beynəlxalq İqtisadiyyat Məktəbində əsasən, Maliyyə (60 tələbə) ixtisasına üstünlük veriblər. Sıralamada ikinci yerdə Dünya iqtisadiyyatı (30 tələbə) və Mühasibat uçotu və audit (30 tələbə) ixtisasları dayanır. Üçüncü yerdə isə İqtisadiyyat (25 tələbə) və Biznesin idarə edilməsi (25 tələbə) ixtisası gəlir.
UNEC haqqında:
UNEC Azərbaycan Dövlət İqtisad Universitetinin brendidir. 21 yanvar 2016-cı ildə Standartlaşdırma, Metrologiya və Patent üzrə Dövlət Komitəsi tərəfindən UNEC brendi qeydiyyata alınaraq, patentləşdirilib. Brend təsdiqlənərkən Standartlaşdırma, Metrologiya və Patent üzrə Dövlət Komitəsi xüsusi təsnifatın 41-ci sinfini əsas götürərək – tərbiyə etmə, tədris prosesinin təmin edilməsi, əyləncələr, idman və mədəni-maarif tədbirlərinin təşkili, ikinci isə 42-ci sinif – elmi və texnoloji xidmətlər və onlara aid elmi tədqiqatlar və işləmələr, sənaye analizi və elmi tədqiqatlar üzrə xidmətlər, kompüterlərin texniki və proqram təminatının işlənməsi və təkmilləşdirilməsi əsas götürüb.

Tehsil-press.az