Azərbaycan Dövlət Xəzər Dəniz Gəmiçiliyinin sabiq rəisi Aydın Bəşirova yeni vəzifə verilib.
Təhsil-press.az xəbər verir ki, bu barədə Afn.az informasiya yayıb. Məlumata görə, o, fövqəladə hallar naziri Kəmaləddin Heydərovun köməkçisi vəzifəsinə təyin edilib.
Sayta danışan mənbə qeyd edib ki, artıq xeyli müddətdir ki, Bəşirov vəzifəsinin icrasına başlayıb. Amma maraqlıdır ki, məlumat ictimaiyyətə açıqlanmır:
“FHN daxilində çoxları bilmir ki, Aydın Bəşirov nazirlikdə hansı vəzifəni tutur. Görünən odur ki, sabiq rəis bir müddətdən sonra nazir müavini təyinatı da ala bilər. Ən azı FHN-də idarə rəislərindən birini əvəzləməsi gözləniləndir”.
Nazirlikdən Modern.az-a Aydın Bəşirovla bağlı təyinatı təsdiqləyiblər.
Təhsil-press.az xatırladır ki, elə bu gün Aydın Bəşirov Xalq artisti Məleykə Əsədovaya ev hədiyyə etməsi xəbəri ilə gündəmə gəlmişdi. O, jurnalistin “şou adamlarından kiməsə yaxta hədiyyə etmisiniz?” sualına “Mən elə qudurmuşam ki, kiməsə yaxta hədiyyə edim? Evi də hökumətin razılığı ilə vermişəm”, - deyə cavab vermişdi.
Məleykə Əsədova da öz növbəsində bu məsələyə münasibət bildirərək, indiyə qədər heç kimin ona mənzil hədiyyə etmədiyini bildirmişdi.
***
Məlumat üçün bildirək ki, son illərdə FHN-in səlahiyyətləri daha da genişlənib. Belə ki, dövlət başçısı kiçikhəcmli gəmilərin hərəkətinin təhlükəsizliyinin, habelə su hövzələrində xilasetmə işinin təşkili sahəsində idarəetmənin təkmilləşdirilməsi məqsədilə Fövqəladə Hallar Nazirliyinin strukturuna daxil olan Kiçikhəcmli Gəmilərə Nəzarət və Sularda Xilasetmə Dövlət Xidmətini yaradıb.
Aydın Bəşirovun da Kəmaləddin Heydərova köməkçi təyin olunması belə qənaətə gəlməyə əsas verir ki, FHN illərin dənizçisinin təcrübəsindən yararlanacaq.

Təhsil-press.az