Azərbaycanın Rusiyadakı yeni diaspor təşkilatının təsis qurultayı gələn ilin fevral ayında keçiriləcək.
Bu barədə Rusiya bürosuna Ümumrusiya Azərbaycan Konqresinin (ÜAK) prezidenti, akademik Fazil Qurbanov bildirib.
Onun sözlərinə görə, yeni təşkilatın yaradılması barədə qərar artıq qəbul edilib.
"ÜAK-ın ləğv edilməsi Azərbaycan icmasına ciddi zərbə oldu. Rusiya Ali Məhkəməsi qərarını təşkilatın fəaliyyətindəki - Nizamnamə, qurultayların keçirilmə vaxtı və s. kimi kobud pozuntularla əsaslandırdı. Bu gün bu səhvləri düzəltmək və yeni, layiqli təşkilat yaratmaq imkanımız var", - F.Qurbanov deyib.
Onun sözlərinə görə, yeni təşkilatın adı və Nizamnaməsi hələ müzakirə olunur və bu barədə yekun qərar Rusiya Azərbaycanlıları Qurultayında qəbul ediləcək.
"Hesab edirəm ki, tələsməməliyik. ÜAK-ın əvvəlki rəhbərliyinin səhvlərini nəzərə almalı, Rusiyadakı bütün Azərbaycan icmalarının rəhbərlərinin həmrəyliyinə nail olmalı, qurultaya ciddi hazırlaşmalıyıq. Rusiyada dekabr və yanvar ayları Yeni il bayramları ilə əlaqədar "yarımçıq" olur. Ona görə də yeni təşkilatın təsis qurultayı, çox güman, 2018-ci ilin fevral ayında keçiriləcək", - o vurğulayıb.
F.Qurbanov həmçinin bildirib ki, Azərbaycanın Diasporla İş üzrə Dövlət Komitəsi yaşananlardan xəbərdardır və bütün bu müddət ərzində ÜAK və Rusiya azərbaycanlılarını dəstəkləyib.
***
Rusiya Federasiyasında bu yaxınlarda ləğv edilmiş Ümumrusiya Azərbaycan Konqresinin (ÜAK) yerinə yeni struktur yaradılır.
Bu barədə virtualaz.org-un Moskva bürosuna ÜAK-ın Rusiya paytaxtı üzrə icraçı direktoru, Azərbaycan mədəniyyətinin dirçəlişi və inkişafı fondunun direktoru Şamil Tağıyev məlumat verib.
Ş.Tağıyev Rusiyanın regionlarından olan Azərbaycan icmaları rəhbərlərinin Ümumrusiya Azərbaycan Konqresinin prezidenti akademik Fazil Qurbanova məktub ünvanladıqlarını və ona yeni yaranacaq təşkilata rəhbərlik etməyi təklif etdiklərini təsdiqləyib: “Onu son qurultayda seçiblər. Amma, əlbəttə, yeni təşkilatı nəzərə alaraq, yeni qurultay olacaq, yeni seçkilər keçiriləcək. Ancaq səmimi deyəcəyəm, Fazil Qurbanova alternativ tapmaq çətindir. O, həyatının çox hissəsini Moskvada yaşamış nüfuzlu insandır. Ona görə də yeni təşkilat qarşısında diaspora başçısının seçimi ilə bağlı məsələ yalnız formal cəhətdən durur”.
Ş.Tağıyev qeyd edib ki, yeni təşkilat ÜAK-ın bazasında yaradılacaq. Amma ümid edir ki, yenilənmələr də olacaq: “Çalışacağıq ki, peşəkarları cəlb edək. Çünki diaspora ilə iş yalnız restoranlarda konsertlərin və ya tədbirlərin keçirilməsi deyil. Bu – qeyri-formal diplomatiyadır və bununla onu bilən insanlar məşğul olmalıdır”.
Yeni təşkilatın necə adlanacağına gəlincə, Ş.Tağıyev bildirib ki, hələlik ad təsdiq edilməyib: “Amma "köhnə-yeni" rəhbərlik – onun tərəfdarıdır ki, əvvəlki ad-ÜAK saxlanılsın. Bu mümkündür, axı əvvəlki Ümumrusiya Azərbaycan Konqresi artıq mövcud deyil, deməli, ÜAK-ı hüquqi cəhətdən yenidən qeydiyyatdan keçirmək olar”.
“Sizdə yeni ÜAK-la Rusiya rəsmi strukturları arasında problemlər yaranacağı baxımından qorxu yoxdur ki...” sualına cavab verərkən Ş.Tağıyev deyib: “Əgər təşkilat Ədliyyə Nazirliyi vasitəsilə qeydiyyatdan keçəcəksə, onda hər şey yaxşı olacaq”.



Qəti qərarın nə vaxt qəbul ediləcəyinə gəlincə, Ş.Tağıyev bir daha vurğulayıb ki, yeni təşkilatın yaradılması haqda qəti qərar artıq qəbul edilib: “Amma köhnə ÜAK-ın ləğvi ilə bağlı texniki detallar var. Ona görə də təşkilatın qeydiyyatı yarım ildən bir ilə qədər çəkə bilər. Axı bu, federal səviyyəli strukturdur. Düşünürəm ki, hansısa nüansları Diasporla iş üzrə Azərbaycan Dövlət Komitəsi ilə də razılaşdırmaq lazım gələcək.
Bir daha vurğulayıram, biz kadrların tərkibinin ən azı 80 faiz yenilənməsinə ümid edirik ki, yeni təşkilat köhnə ÜAK-ın taleyini təkrarlamasın”.

Tehsil-press.az