Somali son 40 ilin ən ciddi quraqlıq mövsümü ilə üzləşib. 2022-ci ildə ölkənin milyonlarla sakini aclıqla qarşılaşa bilər.
Bu barədə məlumat Britaniyanın “Oxfam” xeyriyyə təşkilatının hesabatında yer alıb.
“Somalinin təxminən 90%-i ardıcıl olaraq yağıntısız 3 mövsümdən sonra şiddətli quraqlıq yaşayır. Ölkənin bəzi bölgələri son 40 ilin ən quraq mövsümü ilə üzləşib. Təxminən 3,5 milyon insan artıq ciddi ərzaq çatışmazlığı ilə qarşılaşıb, milyonlarla insan isə gələn ilin əvvəlində aclıq təhlükəsi ilə üzləşmək riski ilə qarşı-qarşıyadır”, - deyə təşkilatın hesabatında qeyd olunub.
Vurğulanır ki, bu, növbəti mövsümdə məhsul əkmək və yaxud mal-qara üçün örüş yerlərinin tapılması şanslarının sıfıra enməsi ilə əlaqədardır.
Təşkilatın proqnozuna görə, ölkədə 7,7 milyon insan 2022-ci ildə təcili humanitar yardıma ehtiyac duyacaq ki, bu da ölkə əhalisinin təxminən yarısını təşkil edir.

Tehsil-press.az