Ötən gecədən bəri ölkə ərazisində davam edən yağışlar bir sıra şəhərlərə, o cümlədən, paytaxt Bakıda da problemlər yaradıb. Belə ərazilərdən biri də paytaxt Yasamal rayonu ərazisində MİDA tərəfindən inşa olunan şəhərcikdir.

"Unikal" xəbər verir ki, Yasamal Yaşayış Kompleksində yerləşən binaların həyətini su basıb. Elə bir vəziyyət yaranıb ki, bəzi avtomobillər yarıya qədər suda qalıb.

Bəzi binalarda sakinlər həyətə çıxa bilməyiblər. Görünən odur ki, binaların tikintisini həyata keçirən MİDA kanalzasiya sistemi standartlara uyğun qurmayıb. Nəzərə alsaq ki, dünən gecəki yağışın həcmi və müddəti elə də çox olmayıb. Amma MİDA-nın qurduğu sistemlərin bərbad olduğundan belə bir acı mənzərə yaranıb.

Sözügedən görüntülər sosial şəbəkələrdə də geniş yayılıb. Bina sakinləri baş verən durumdan narahatlıqlarını ifadə ediblər. Hətta fəsadın aradan qaldırılması prosesini belə sakinlər öz üzərlərinə götürüblər.

Buradan belə nəticə çıxır ki, MİDA-nın mənzillərin satışındakı müəmmalı vəziyyət tikinti, kanalizasiya və digər sahələrdə də var. Ölkə başçısının sərəncamı ilə yaradılan bu qurum, ayrılan milyonlarla dövlət vəsaitinin göyə sovrulması, humanist missiyanın lazımi səviyyədə icra olunmaması MİDA rəhbərliyinin işinin öhdəsindən gələ bilməməsini göstərir. Qeyd edək ki, Azərbaycan Respublikasının Mənzil İnşaatı Dövlət Agentliyinin İdarə Heyətinin rəhbəri Sadiq Sadıqovdur.


Tehsil-press.az