Milli Məclisin keçmiş və indiki deputatları arasında maraqlı polemika yaşanıb.Elm və təhsil sahəsi üzrə tanınmış mütəxəssis, sabiq deputat Etibar Əliyev millət vəkili, ADA Universitetinin prorektoru Fariz İsmayılzadənin dünyada universitetlərin yeni rolu barədə postuna öz “Facebook” səhifəsində münasibət bildirib.
Əvvəlcə Fariz İsmayılzadənin qeydləri barədə: “Universitetlər dünyada öz rolunu dəyişib. Əvvəllər onlar yalnız təhsillə məşğul olurdular. Lakin son illərdə Qərb, indi isə Asiya ölkələrində universitetlər tədqiqat və innovasiya mərkəzlərinə çevrilib. Bu qurumlar artıq texnoloji yeniliklər və kəşflər edir, onları kommersiyalaşdıraraq bazara çıxarır və bununla da iqtisadi inkişafı stimullaşdırırlar”.
F.İsmayılzadənin fikrincə, yanaşma dəyişilməlidir. Universitetlərdə yeni imkanlar yaratmaq, tədqiqat fondları təsis etmək lazımdır. Müəllimlərin tədrislə məşğul olması ilə yanaşı, tədqiqat işləri apara bilməsi üçün də qrantların ayrılması təmin edilməlidir.
Etibar Əliyev isə bildirir ki, əslində F.İsmayılzadənin dedikləri yenilik deyil:“Epitemey təfəkkür tərzidir. Dünyada universitetlərin rolu indi dəyişməyib. Dünyanın nüfuzlu universitetləri yaranandan tədqiqatları təhsildən önə çəkiblər. Deputat sanki qəflət yuxusundan indi ayılıb. 1901-ci ildən başlayaraq elm sahələrində mühüm kəşflərə Nobel mükafatı, 1936-cı ildən başlayaraq isə riyaziyyat sahəsində mühüm isbatlara görə Filds medalı verilir. İstər Nobel mükafatına, istərsə də Filds medalına layiq görülənlər universitet alimləridir. Yəni ənənə var və ənənəni qoruyub saxlayırlar”.
E.Əliyev vurğulayıb ki, bizim universitetlərdəki laboratoriyalar ötən əsrin 60-cı illərindən qalmadır. O, təssüflə qeyd edib ki, elmə büdcədən ayrılan vəsait isə 0,2 faizdir:“Vaxt itirmədən Qarabağ Universitetinin nəzdində “Silikon vadisi” yaradılmalıdır. 2010-cu ildə yaradılan Elmin İnkişafı Fondunun ayırdığı qrantlar elmin inkifına töhfə vermədi. Elmə filantropların dəstəyi yox səviyysəsindədir. Dünaynın aparıcı universitetlərində çalışan tanınmış alimlərimizin Azərbaycan elminin inkişafına dəstəyi hiss olunmur. Universitet kitabxanalarının fondu yenilənmir. Alimlərin böyük kəsimi elmi yeniliklərlə maraqlanmır. Buna tələb də yoxdur. Dəfələrlə elm adamları, tanınmış intellektuallarla magistr və doktorantların görüşünün təşkil olunmasını təklif etmişik. Universitet rəhbərləri üçün belə məsələlər maraqlı deyil”.
Ekspert doktorantlara və magistrlərə "Elmin fəlsəfəsi" fənninin tədrisini təklif etdiyini, fənnin proqramını da yazdığını xatırladıb: “Lakin əhəmiyyəti yoxdur. Peşəkar kompetensiyaların inkişafı fənlərarası biliklərin əsasını öyrənmədən mümkün deyil. Tədqiqatlarlda fənlərarası strategiya işlənməyib. Bu istiqamətdə kitablar yazılmayıb.Elmi kəşflər və innovasiyalar göydən düşmür. Bunların kökü olmalıdır. Köksüz ağac bar verməz: elmdə, təhsildə köhnə və narsist təfəkkürlə heç nəyə nail olmaq mümükün olmayacaq”./azpolitika/
Tehsil-press.az
