"Mən çox sevinirəm ki, 32 ildən sonra yenidən qatarla Ağdama gedirəm. Biz Bakıya gələndə Allahverdi Bağırovun övladları azyaşlı idilər. Müharibəni görmüş insan indiki situasiyada çox fərqli təəssürat yaşayır. Elə bilirəm ki, yuxudayam".

Bunu açıqlamasında ehtiyatda olan polkovnik-leytenant, Milli Qəhrəman Allahverdi Bağırovun əsgəri Zahid Qarayev deyib.

O həm Birinci, həm də İkinci Qarabağ müharibələrində iştirak etdiyini deyib:

"Lakin mən özümə söz vermişdim ki, Qarabağda bərpa-quruculuq işləri yekunlaşandan sonra bütün medallarımı taxıb səfərlərə gedəcəyəm. O zamana qədər heç bir medalımı taxmayacağam.

Mənim bir arzum da var idi. Deməli, o vaxt Şəkidə 15 bayrağımızı hazırlamışdıq. Hansı ki, ulu öndər Heydər Əliyevə də o bayraqlardan birini göndərmişdik. O bayraqlardan biri məndə qalmışdı. Sonuncu dəfə Qarabağa gedəndə həmin bayrağı da özümlə aparmışdım. Hazırda sevindiyimdən bilmirəm, nə edim. Təsəvvür edin, bu gün 30 ildən çoxdur ki, görmədiyim adamları görmüşəm. Bu qədər müddət keçməsinə baxmayaraq, biz yenə də bir-birimizi tanıdıq. Ulu öndərimizə, Ali Baş Komandanımıza, şəhidlərimizə, qazilərimizə minnətdarıq".

Tehsil-press.az