Bakıdan avqustun 30-u saat 07:10-da Ağdama yola düşən sərnişin qatarı təyinat məntəqəsinə çatıb.

Bununla da 32 illik fasilədən sonra ilk Bakı-Ağdam qatar reysi gerçəkləşib.

11:48

32 ildən sonra ilk dəfə bu gün Bakıdan Ağdama yola düşmüş sərnişin qatarında tam doluluq qeydə alınıb.

27 avqustda satışa çıxarılmış biletlər üç gün ərzində satılıb.

Sərnişinlər arasında Ağdamdan olan tanınmış ictimaiyyət nümayəndələri, media mənsubları və qonaqlar da var.

Müasir "Stadler" qatarı bu gün saat 7:10-da Bakıdan Ağdam istiqamətində hərəkətə başlayıb. Qatar saat 18:20-də əks istiqamətdə yola düşəcək.

07:10

Bu gün Bakı-Ağdam sərnişin qatarının fəaliyyəti 32 ildən sonra bərpa edilib.

Uzun fasilədən sonra baş tutan bu tarixi səfərdə media nümayəndələri, ekspertlər və tanınmış ağdamlılar iştirak edirlər.

Bu münasibətlə Ağdam vağzalında xüsusi tədbir keçiriləcək və konsert proqramı təşkil olunacaq.

Bununla da, bu gün Bakı ilə Ağdam arasında dəmir yolu əlaqəsi rəsmi şəkildə bərpa olunur.

Xatırladaq ki, işğal dövrünə qədər Bakıdan Ağdama kimi sərnişindaşımalar Bakı-Xankəndi-Bakı marşrutu üzrə hərəkət edən yataq tipli qatarla həyata keçirilirdi. Qatarlar Bakı-Ağdam-Bakı istiqamətində sonuncu dəfə 1993-cü ildə hərəkət edib. Həmin vaxt qatarla Ağdama kimi 371 km olan məsafə 8 saat yarıma qət edilirdi.

Bakı-Ağdam-Bakı dəmir yolu Qarabağ iqtisadi rayonunda ictimai nəqliyyatın əlçatanlığını artırmaqla yanaşı, Ağdam və ətraf rayonların sosial-iqtisadi dirçəlişinə, Azərbaycanın bu bölgədə nəqliyyat imkanlarının genişlənməsinə, bütövlükdə Böyük Qayıdışa mühüm töhfə verəcək.

Tehsil-press.az