"Torpaqlarımız işğaldan azad ediləndən sonra mən birinci dəfə Ağdama gələndə bircə məsciddən bildim ki, haradayam. Hər yer dağıdılıb, xarabalığa çevrilmişdi. Mənimlə gələn yoldaşlar evlərini tapa bilmirdilər. O qədər ağır hadisə idi ki, ifadə etmək mümkün deyil. Amma indi bu bina, Muğam Mərkəzi, tikilən binalar, bərpa-quruculuq işləri - hamısı həsrətimizə son qoyur. Torpaq indi əvvəlkindən də müqəddəsdir. Bu torpağa şəhidlərin qanı tökülüb, indi onların da ruhu şaddır. Onlar da bizimlə bərabər sevinirlər".

Milli Qəhrəman Şirin Mirzəyevin həyat yoldaşı, sabiq millət vəkili Flora Qasımova Bakı-Ağdam qatarının fəaliyyətə başlaması münasibətilə keçirilən tədbirdə deyib.

O bildirib ki, bu gün çox sayda vətəndaşımız evlərinə qayıtmağın həsrətindədir:

"Biz çalışmalıyıq ki, bərpa və quruculuq işlərini daha sürətlə həyata keçirək. Dəmir yolu bu istiqamətdə bizə kömək edəcək. Çünki yükdaşımaları da bu vasitə ilə həyata keçiriləcək. İnanıram ki, qısa bir müddətdə bu dəmir yolu Xankəndiyə, mənim doğulduğum torpağa qədər uzanacaq".

"Kaş Şirin Mirzəyev də bu günləri görərdi. O, Daxili Qoşunlarda çalışırdı. İşini atıb döyüşlərə qatıldı, Ağdamda şəhid oldu. Çünki dözə bilmirdi, torpağa bağlı insan idi. Bütün şəhidlərimizə Allahdan rəhmət, qazilərimizə cansağlığı diləyirəm. Ən əsası isə cənab Prezidentimiz sağ olsun ki, bizim üzümüzü ağartdı, başımızı uca elədi", - sabiq deputat fikrini tamamlayıb.

Tehsil-press.az