Hemofiliyalı Xəstələrin Respublika Assosiasiyası Prezident yanında QHT-lərə Dövlət Dəstəyi Şurasının dəstəyi ilə “Hemofiliya xəstəliyi üzrə Dövlət Proqramının qiymətləndirilməsi və dövlət–ictimai idarəetmənin bir hissəsi kimi səhiyyədə ictimai nəzarətin təşkili” adlı layihənin icrasına başlayıb.
Bu məqsədlə Gəncə şəhər Səhiyyə İdarəsində tibb müəssisələri əməkdaşlarının iştirakı ilə maarifləndirici tədbir keçirilib.
Tədbirdə çıxış edən Hemofiliyalı Xəstələrin Respublika Assosiasiyasının sədri Gülnarə Hüseynova əvvəlcə iştirakçılara hemofiliya xəstəliyi haqqında ətraflı məlumat verib. Bildirilib ki, hemofiliya valideynlərin genləri ilə ötürülən nadir anadangəlmə xəstəlikdir. Hemofiliyalı xəstələrin qanında laxtalanma faktoru çatışmadığından onlarda qanaxma sağlam insanlara nisbətən daha uzun müddət davam edir.
Hemofiliya ilə yalnız kişilər xəstələnir, genin ötürücüsü isə qüsurlu genin daşıyıcısı qadınlar olur. Lakin hemofiliyaya bəzən ailələrində bu xəstəlik olmayan insanlarda da rast gəlinir. Bu isə sporadik hemofiliya adlanır. Bu zaman xəstəliyə insanın öz genlərindəki dəyişiklik səbəb olur.
Xəstəliyin əlamətləri, bu xəstəliyi yaradan səbəblər, eləcə də hemofiliya ilə mübarizə və müalicə vasitələri haqqında danışan Gülnarə Hüseynova bildirib ki, hazırda Azərbaycanda 1500-dən çox hemofiliyalı xəstə qeydiyyatdadır.
Dövlətin hemofiliyalı xəstələrə göstərdiyi diqqət və qayğıdan söz açan G.Hüseynova deyib ki, 2007-ci ildən Səhiyyə Nazirliyinin müvafiq strukturlarının səyi ilə Dövlət Proqramı çərçivəsində bu cür xəstələrin müalicəsi bahalı dərman preparatları ilə aparılır. Həmçinin 18-35 yaş kateqoriyalı hemofiliyalı vətəndaşların vəziyyətinin tibbi-sosial kriteriyalarla qiymətləndirilməsi və onların cəmiyyətə tam inteqrasiyasını təmin etmək məqsədilə hemotoloq, artoped, nevropatoloq, stomatoloq, rentgenoloq, UZİ müayinəsinin aparılmasına şərait yaradılması üçün müvafiq yerli icra orqanları ilə birgə tədbirlər həyata keçirilir, müxtəlif təkliflər hazırlanır.
Sonda tədbir iştirakçılarını maraqlandıran suallar cavablandırılıb.

Tehsil-press.az