Azərbaycan Dövlət İqtisad Universitetində (UNEC) ixtisas seçimi ərəfəsində abituriyentlərə dəstək olmaq məqsədilə start verilən “UNEC-i tanı” layihəsi uğurla davam edir.
Layihə çərçivəsində 300-ə yaxın abituriyentə fakültələr, ixtisaslar, keçid balları barədə məlumat verilib. Eyni zamanda, onlara ixtisas seçimi, seçmək istədikləri ixtisasın üstünlükləri və gələcək karyera imkanları istiqamətində dəstək göstərilib. Azərbaycanın regionunda yaşayan və UNEC-ə gəlmək imkanı olmayan abituriyentlərin müraciətləri isə universitetin rəsmi “Facebook” səhifəsində cavablandırılıb.
Layihədə ölkənin aparıcı məktəbləri ilə yanaşı, region məktəblərinin məzunları da iştirak edirlər. Onların arasında II ixtisas qrupu üzrə 600-dən yüksək bal toplayan abituriyentlər üstünlük təşkil edib. Avropanın aparıcı universitetlərinin diplomuna UNEC-də sahib olmaq imkanı abituriyentlərin xüsusi marağına səbəb olub. Onlar 4 il ərzində London Universiteti/London İqtisadiyyat Məktəbi, Fransanın Monpelye Universiteti və Parisdə yerləşən Fransa və ABŞ-ın birgə təhsil müəssisəsi olan ICD Beynəlxalq Biznes Məktəbinin diplomunu qazanmaq imkanını böyük şans kimi dəyərləndiriblər.
Abituriyentlərin diqqətinə çatdırılıb ki, 600 və daha yüksək bal toplayanlar, eləcə də beynəlxalq olimpiada qalibləri arasında UNEC-i seçənlər bir semestr boyu hər ay 100 manat məbləğində təqaüd qazanmaq şansı əldə edəcəklər.
Qeyd edək ki, UNEC-ə I, II, IV və V ixtisas qrupları üzrə tələbə qəbulu həyata keçirilir.
Layihədə iştirak etmək istəyənlər 18-46 “Qaynar xətti”nə və ya 492-60-43 telefon nömrələrinə zəng etməklə qoşula, həmçinin UNEC-in rəsmi “Facebook” səhifəsinə yaza bilərlər. Layihə ixtisas seçimi bitənədək davam edəcək.

UNEC-in Mətbuat Xidməti