Uzun müddətdir I növ onurğa amiotrofiyasından (SMA) əziyyət çəkən Tunar Bağırovun xəstəliyinin müalicəsi üçün məbləğ toplanırdı.
Məbləğin müəyyən hissəsi könüllü toplanıldıqdan sonra qalan hissənin tamamlanması üçün Heydər Əliyev Fondu şirkətləri azyaşlının sözügedən xəstəlikdən xilas olması üçün başladılan kampaniyaya qoşulmağa çağırdı.
Tunarın anası Səbinə Əliyeva Azxəbər-ə açıqlamasında Tunar üçün lazım olan məğləğin toplandığını deyib.
O bildirib ki, xəstəxanadan dəvət gözləyirlər:
“2 milyon 400 min dolların müəyyən hissəsi toplanmışdı, qalan hissəsi də qarşılanacaq. Hazırda müalicə üçün isə xəstəxananın dəvətini gözləyirik. Xəstəxana dəvət etməlidir.
Xəstəxana ABŞ-dadır, viza məsələsi də həll olunmalıdır. Buna görə hələlik dəqiq vaxt bilinmir. Bu gün xəstəxanadan bizimlə əlaqə saxladılar.
Yəqin ki, növbəti həftə dəvət hazır olacaq. Gələn həftə görüş nəzərdə tutulur. Əsas odur ki, xəstəxana bizi qəbul edib, qiyməti də deyiblər”.
Səbinə Əliyeva qeyd edib ki, iki həftə sonra ABŞ-a getməyi planlaşdırırlar:
“Əgər viza işləri həll olunarsa, iki həftə sonra ABŞ-a gedə bilərik. Biz Türkiyədə oturum işini həll edirdik ki, buradan gedək, bu səbəbdən də bir az gecikmələr oldu. Getmək o qədər də asan deyil. Çünki həkimlər əmin olmalıdır ki, mən uşağa ev şəraitində tam nəzarət edə bilirəm.
Mən lazımi aparatlarla da işləməyi öyrənirəm, çünki bu, tələb olunur. Ona görə ki, əgər hər hansı gözlənilməz hallar olarsa, uşağa ev şəraitində yardım edə bilim. Ümid edirəm, yaxın günlərdə bunlar həll olacaq”.

Tehsil-press.az