HƏMAS rəsmisi Xəlil əl-Hayya “Associated Press”ə müsahibəsində “HƏMAS İsraillə 5 il və ya daha uzun müddətə atəşkəs imzalamağa hazırdır” deyib. O, təşkilatın bunun üçün bəzi şərtlərinin olduğunu bildirib.

“Əgər müstəqil Fələstin dövləti yaradılarsa, o zaman təşkilat silahları yerə qoyacaq və siyasi bir partiyaya çevriləcək. HƏMAS o zaman geri çəkiləcək ki, 1967-ci il sərhədləri boyunca vahid Fələstin dövləti yaradılsın, beynəlxalq hüquqa uyğun olaraq fələstinli qaçqınların qayıdışı təmin edilsin. Ancaq o halda təşkilatın hərbi qanadı fəaliyyətini dayandıracaq” – HƏMAS rəsmisi deyib.

Bu, HƏMAS-ın təslim olması kimi anlaşıla bilər? Ümumiyyətlə, İsrail bu təklifi qəbul edəcək? Bu şərtlər ilə sülhün əldə edilməsi mümkündürmü? HƏMAS silahı yerə qoyacaq?

Siyasi şərhçi Kənan Rövşənoğlu deyib ki, burda təslim olmaqdan söhbət getmir:

“HƏMAS 2017-ci ildə yeni proqram və nizamnaməsini elan edəndə buna bənzər müddəalar var idi. Tamamilə normal, konstruktiv təkliflərdir.

İsrail BMT-nin də tələb etdiyi kimi, 1967-ci il müharibəsinə qədərki sərhədlərə çəkilib Fələstin dövlətinin yaranmasına imkan versə, HƏMAS-ın ayrıca militan partiya olmasına gərək yoxdur. O da dövlətin quruculuğunda iştirak edə bilər. Silahlı qanad da orduya transfer olar.

Belə təcrübə İraq və İsraildə olub. HƏMAS-ın ciddi siyasi təcrübəsi və elektoral dəstəyi var. 2006-ci il seçkilərində 60 faizdən çox səs alıb. Yəni təkliflər kifayət qədər normal və rasionaldır”.

Tehsil-press.az