8 noyabr 2025‑ci il tarixində Bakı şəhərinin Azadlıq meydanında keçirilən hərbi parad Azərbaycan üçün yalnız rəmzi tədbir deyil, həm də strateji mesajların, hərbi gücün və dövlətin siyasi iradəsinin nümayişi idi.

Sözsüz ki, hərbi gücümüzün nümayişi dünya mediasının da diqqətini cəlb edib. Bəzi media resursları parad barədə obyektiv və müsbət yazılar dərc etsələr də, bəzilərində həqiqəti əks etdirməyən məlumatlara da rast gəlindi.

Paradın açılışında Prezident İlham Əliyev və birinci xanım Mehriban Əliyeva, rəsmi qonaqlardan isə Türkiyə Prezidenti Rəcəb Tayyib Ərdoğan və Pakistan Baş naziri Məhəmməd Şahbaz Şərif iştirak edib.

Bu, Azərbaycanın beynəlxalq müttəfiqləri ilə strateji əlaqələrinin güclü olduğunu göstərən simvolik mesajdır. Xarici liderlərin iştirakı paradın yalnız daxili auditoriya üçün olmadığını, regionda Azərbaycanın mövqeyini beynəlxalq səviyyədə də vurğulamaq məqsədi daşıdığını göstərir.

Paradda müxtəlif qoşun birləşmələri iştirak edib, xüsusi təyinatlı qüvvələr, sərhədçilər, daxili qoşunlar və digər struktur vahidlər nümayiş etdirilib. Nümayiş edilən hərbi texnika arasında zirehli maşınlar, tanklar, artilleriya sistemləri, hava vasitələri və dronlar, eləcə də yeni mobil döyüş kompleksləri (“Viking”, “Cobra‑2”) yer alıb. Texnika və qoşun nümayişi həm Azərbaycan Silahlı Qüvvələrinin modernləşməsini, həm də regionda güc balansını göstərir. Dron və mobil komplekslərin təqdimatı müasir müharibə strategiyasının mərkəzində olan texnologiyalara diqqəti çəkib.

Vətən müharibəsində qələbənin 5-ci ildönümünə həsr olunmuş hərbi parad yalnız hərbi nümayiş deyildi, həm də siyasi və strateji mesajların daşıyıcısı idi. Regional və beynəlxalq auditoriya üçün paradda xarici liderlərin iştirakı Azərbaycanın geosiyasi mövqeyinin təsdiqi, modern hərbi güc nümayişi və regiondakı mövqelərin möhkəmləndirilməsi deməkdir.

Rusiya mediasında paradla bağlı həm pozitiv - Azərbaycan gücünün və strateji mövqeyinin nümayişi, həm də tənqidi - tədbirin simvolik xarakteri və real güc göstəricilərinin qeyri-müəyyənliyi ilə bağlı fikirlər yer alıb.

Ümumilikdə, Rusiya mətbuatında Bakıdakı hərbi parad geniş işıqlandırılıb. “Газета.Ru” və “РИА Новости” paradda nümayiş olunan hərbi texnika və qoşun birləşmələrini vurğulayaraq Azərbaycan Silahlı Qüvvələrinin modernləşməsini və regiondakı rolunu qeyd ediblər. “Кавказский узел” isə paradın hərbi gücü tam şəkildə əks etdirmədiyini vurğulayıb.

Tehsil-press.az