“Məcburi dövlət sosial sığortası üzrə rüblük hesabatlar” elektron imza kartına tələbatı artırıb

“Məcburi dövlət sosial sığortası üzrə rüblük hesabatlar” elektron imza kartına tələbatı artırıb Əmək və Əhalinin Sosial Müdafiəsi Nazirliyi (ƏƏSMN) tərəfindən elektronlaşdırılaraq “Elektron hökumət” portalına inteqrasiya edilən “Məcburi dövlət sosial sığortası üzrə hesabatların təqdim edilməsi” adlı yeni xidmət elektron imzaya tələbatı artırıb.
“Elektron hökumət” portalından Tehsil-press.az-a bildirilib ki, artıq ƏƏSMN yanında Dövlət Sosiyal Müdafiə Fondu ölkə üzrə iri və orta sahibkarlardan hesabatları tamamilə elektron qaydada qəbul edir. Bu elektron xidmətdən istifadə etmək üçün sahibkarın möhür hüququnu təsdiqləyən elektron imza kartı olmalı, yaxud səlahiyyətli şəxs möhürdən istifadəyə ona icazə verməlidir.
Milli Sertifikat Xidmətləri Mərkəzi (MSXM) sahibkarların nəzərinə çatdırır ki, elektron imzanı heç yerə getmədən onlayn sifariş etmək olar. Həmçinin “Məcburi dövlət sosial sığortası üzrə hesabatların təqdim edilməsi” xidməti üçün möhür səlahiyyətli elektron imza kartı olan müəssisə rəhbəri elektron imzaya malik istənilən əməkdaşına elektron formada səlahiyyət verə bilər.
Elektron imzanı “www.e-imza.az” internet ünvanından onlayn sifariş etmək mümkündür. Bunun üçün istənilən vətəndaş “www.e-imza.az” saytından “onlayn müraciət” menyusuna daxil olub “Hüquqi şəxslər və sahibkarlıqla məşğul olan fiziki şəxslər üçün” bölməsini seçməlidir. Daha sonra elektron ərizə formasındakı anketi tamamlayıb onlayn qaydada ödəniş etməklə elektron imza kartı sifariş edə bilər. Sifariş zamanı MSXM-in təqdim etdiyi 2 elektron imza daşıyıcısından birini – smart-kart və ya smart-tokeni seçmək mümkündür.
Smart-tokenlər “Elektron imza” sertifikat daşıyıcılarının yeni növüdür. USB formasında olan tokenlərdən istifadə zamanı əlavə tələb olunan kart oxuyucuya ehtiyac olmur, həmçinin proqram təminatı tokenin daxilində yerləşir və ilkin istifadə zamanı avtomatik şəkildə istifadəçi qurğusuna yüklənərək asanlıqla quraşdırılır.
Sifariş mərkəzə daxil olan kimi elektron imza sertifikatı hazırlanır və bu barədə vətəndaşa elektron poçt və telefon vasitəsilə məlumat verilir. Sertifikatının hazır olması barədə məlumat bildirişi almış şəxs Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzində şəxsiyyət vəsiqəsini təqdim etməklə elektron imza sertifikatını ala bilər.
MSXM-in təqdim etdiyi elektron imza daşıyıcısı olan smart-kart və ya USB-token istifadəçiləri 3 il müddətində əlavə heç bir ödəniş etmədən istənilən qədər əməliyyat apara bilərlər.
Beləliklə, onlayn sifariş edərək vətəndaş operativliyi təmin etməklə yanaşı, e-imza sertifikatlarının alınmasında yarana biləcək vaxt itkisinin qarşısını alır.

Tehsil-press.az

Oxşar xəbərlər