Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunda Qırğızıstan yazıçıları ilə görüş keçirilib. Tədbir Dünya Gənc Türk Yazarlar Birliyinin (DGTYB) təşkilatçılığı ilə reallaşıb.
Bu barədə Tehsil-press.az-a Ədəbiyyat İnstitutunun İctimaiyyətlə əlaqələr şöbəsindən məlumat verilib.
Tədbiri açan AMEA-nın vitse-prezidenti, Ədəbiyyat İnstitutunun direktoru, akademik İsa Həbibbəyli iki qardaş ölkə arasında əlaqələrdən danışıb. “Qırğızıstanla Azərbaycan arasında ən böyük körpü Çingiz Aytmatovdur. Biz onu həm də Azərbaycan yazıçısı hesab edirik”, - deyə akademik bildirib. O, həmçinin qədim qırğız dastanı “Manas”ın ölkəmizdə məşhur olduğunu və öyrənildiyini söyləyib.
Diqqətə çatdırılıb ki, Mehman Həsənli qırğız ədəbiyyatı ilə bağlı dissertasiya müdafiə edib, Çingiz Aytmatovun əsərlərini Azərbaycan türkcəsinə uyğunlaşdırıb.
İsa Həbibbəyli Dünya Gənc Türk Yazarlar Birliyinin və qurumun Məsləhət Şurasının rəhbəri Əkbər Qoşalının bu istiqamətdə gördüyü işləri yüksək qiymətləndirib.
Sonra Qırğızıstan Yazıçılar Birliyinin sədri Nurlan Kalıbekov çıxış edərək görüşdən məmnun qaldığını bildirib.
DGTYB-nin Məsləhət Şurasının rəhbəri Əkbər Qoşalı görüşün keçirilməsinə şərait yaratdığı üçün institut rəhbərliyinə təşəkkür edib, eləcə də təmsil olunduğu qurumun həyata keçdiyi layihələr haqqında ətraflı məlumat verib. Əkbər Qoşalı ötən il Qazaxıstanın gənc yazarlarının əsərlərinin dilimizə çevrilərək çap olunduğunu, bu il isə “Gənc qırğız şeiri antologiyası”nın işıq üzü gördüyünü xatırladıb.
Tədbirdə Qırğızıstanın gənc yazarlarından Altınbek İsmail, Nuriza Ömürbayeva, Narsulu Qurqubay və Bekbolat Sarıbay şeirlərini söyləyiblər.
Ədəbiyyat İnstitutunun Türk xalqları ədəbiyyatı şöbəsinin əməkdaşlarından İsmixan Osmanlı və Mehman Həsənli çıxış edərək Azərbaycanda ümumtürk ədəbiyyatının öyrənilməsi istiqamətində görülən işlərdən danışıblar.

Tehsil-press.az