Fransa-Azərbaycan Universitetinin yeni binasının açılacağı vaxt məlum oldu

Fransa-Azərbaycan Universitetinin yeni binasının açılacağı vaxt məlum oldu Fransa-Azərbaycan Universitetinin (UFAZ) yeni binasının açılışı sentyabrda keçiriləcək.
Bunu Fransanın Azərbaycandakı səfiri Orelia Buşez bugünkü mətbuat konfansında bildirib.
UFAZ-ın binasının Bakının mərkəzində yerləşdiyini deyən səfir əlavə edib ki, artıq gələn tədris ilindən UFAZ-da tədris yeni binada təşkil olunacaq.
O.Buşez deyib ki, UFAZ layihəsi ən yaxşı şərtlər daxilində həyata keçirilir: "2016-cı ilin sentyabrında UFAZ-ın rəsmi açılışı olub. Artıq 1 ildir ki, UFAZ fəaliyyət göstərir. Bir il ərzində əldə olunan nailiyyətlər müsbətdir. 2016-2017-ci tədris ilində 141 tələbə təhsil alıb".
Səfir qeyd edib ki, tədris ili müddətində universitetin daxili idarəolunması ilə bağlı bir çox işlər görülüb, 2017-ci ilin martında UFAZ-ın İdarəetmə Komissiyasının ilk iclası keçirilib. Müzakirə olunan məsələlərdən biri də universitetlə şirkətlərin əməkdaşlığı olub: "Aydın məsələdir ki, universitet tələbələri hazırlayır və gələcəkdə onların işlə təminatına kömək etməlidir. Bununla bağlı universitetdə karyera yarmarkası da keçirilib".
O.Buşez qeyd edib ki, növbəti illərdə UFAZ-a həm xarici tələbələrin, həm də Dövlət Neft və Sənaye Univetsitetinin ən yaxşı tələbələrinin qəbulu nəzərdə tutulur: "Digər vacib məsələ UFAZ Fondunun yaradılmasıdır. Bu fonda UFAZ-la əlaqəli şirkətlərin cəlbi nəzərdə tutulur".

Təhsil-press.az

Oxşar xəbərlər