AMEA Rəyasət Heyəti aparatının Elm və təhsil idarəsinin təşkilatçılığı ilə akademiyanın elmi müəssisə və təşkilatlarının Təhsil şöbələrinin müdirləri ilə onlayn görüş keçirilib.
Görüş COVID-19 pandemiyası dövründə tədrisin davamlılığının təmini, I kurs magistrantların yay imtahan sessiyasının təşkili, II kurs magistrantların dissertasiyalarının müdafiəsinin vaxtında keçirilməsi məsələlərini, həmçinin doktorantura və dissertanturaya 2020-ci ilin qəbul nəticələrini müzakirə etmək məqsədilə təşkil olunub.
Görüşdə Elm və təhsil idarəsinin rəisi, iqtisad elmləri üzrə fəlsəfə doktoru Fail Kazımov AMEA-nın prezidenti, akademik Ramiz Mehdiyevin “AMEA-nın magistrantları üçün distant (məsafədən) təhsilin təşkil edilməsi haqqında” sərəncamını xatırladıb. O, sözügedən sənədə əsasən akademiyanın tədris prosesində yeni yanaşmanın tətbiqinə başlanıldığını bildirib və xüsusi karantin rejimində təhsil prosesinin davamlılığının təmin olunmasının vacibliyini vurğulayıb. F.Kazımov distant təhsilin ilk təcrübə olmasına baxmayaraq yüksək səviyyədə təşkil edildiyini söyləyib. O, həmçinin AMEA-nın 2020/2021-ci tədris ilinin qəbul planından söz açıb, yeni tədris ilinə hazırlıq işlərinin aparılmasının vacibliyini diqqətə çatdırıb.
Elm və təhsil idarəsinin rəis müavini, texnika üzrə fəlsəfə doktoru Hüseyn Hüseynov magistrantların aralıq qiymətləndirilməsinin mayın 31-dək başa çatdırılmasının önəminə toxunub. O, distant təhsil sahəsində əldə edilən təcrübəni yüksək qiymətləndirərək onlayn rejimdə keçirilən sərbəst işlərin və kollokviumların, o cümlədən seminar qiymətlərinin imtahanqabağı bal cədvəlində nəzərə alınmasının zəruriliyini qeyd edib.
Doktorantura və dissertantura şöbəsinin müdiri, kimya üzrə fəlsəfə doktoru Ömər Gülalov yay imtahan sessiyasında doktorluq imtahanlarının keçirilməsi, eyni zamanda, 2020-ci il üzrə doktoranturaya qəbul nəticələri və növbəti qəbul prosesinə hazırlıqla bağlı məlumat verib.
Magistratura şöbəsinin müdiri, aqrar elmlər üzrə fəlsəfə doktoru Fikrət Feyziyev yay imtahan sessiyasının və magistrlik dissertasiyalarının təşkili ilə bağlı çıxış edib. O, ölkə rəhbərliyinin pandemiya ilə əlaqədar qəbul etdiyi preventiv tədbirləri, xüsusilə sosial məsafəni gözləməklə, istisna halları nəzərə almaqla həm imtahan sessiyasının, həm də magistrlik dissertasiya işlərinin müdafiəsinin ənənəvi yolla aparılacağını qeyd edib.

Tehsil-press.az