Bakı Dövlət Universitetinin (BDU) tələbələri və gənc tədqiqatçıları “COVID-19 üçün nanoterapevtik strategiyalar və gələcək perspektiv“ mövzusunda onlayn elmi seminar keçirilib.
Moderator, BDU-nun elmi fəaliyyətin təşkili və innovasiyalar Mərkəzinin direktoru Məmməd Rəcəbov seminar iştirakçılarını salamlayaraq professor Aziz Eftekharinin elmi fəaliyyəti haqqında məlumat verərək hazırkı çətin şəraitdə belə seminarların, ustad dərslərinin keçirilməsinin əhəmiyyətinə diqqət çəkib.
“COVID-19 üçün nanoterapevtik strategiyalar və gələcək perspektiv“ mövzusunda təqdimatla çıxış edən İran İslam Respublikasının Marağa Universitetinin professoru Aziz Eftekhari COVID-19 infeksiyasının molekulyar diaqnostikası və müalicə üsulları, virusun quruluşu, mənşəyi, xəstəlik əlamətləri, koronavirusların replikasiyası və molekulyar divergensiyası, koronavirusların MERS və SARS növləri, eyni zamanda vaksinlərin hazırlanması, yeni epidemiya təhlükələrinin qarşısının alınmasında innovativ texnologiyaların tətbiqi, milli biotəhlükəsizlik çağırışları kimi məsələlərə aydınlıq gətirib.
Alimin koronavirus epidemiyasının müxtəlif ölkələrdə oxşar cəhətləri və ona qarşı təxirəsalınmaz müdaxilə tədbirlərinə həsr olunan çıxışı iştirakçılar tərəfindən maraqla qarşılanıb.
Virtual seminara qoşulan BDU-nun rektoru Elçin Babayev bu tip maarifləndirici seminarların keçirilmə əhəmiyyətindən söz açaraq Marağa Universitetinin professoru Aziz Eftekhariyə uğurlar arzulayıb. Qarşılıqlı əməkdaşlığın perspektivlərindən danışan rektor əlavə edib ki, universitetdə multidissiplinar tədqiqatlara üstünlük vermək, onları daim diqqətdə saxlamaq lazımdır.
Microsoft Teams platforması üzərindən təşkil olunmuş elmi seminar iştirakçıların böyük marağına səbəb olub.
Onlayn seminar sualların cavablandırılması ilə yekunlaşıb.

Tehsil-press.az