Avropa İttifaqı, Birləşmiş Millətlər Təşkilatının İnkişaf Proqramı (BMTİP) və Peşə Təhsili üzrə Dövlət Agentliyi gələcək peşə təhsili menecerləri üçün yeni təlim proqramını elan edir.
“Peşə təhsilində liderlik və idarəetmə” proqramı 2021-ci ilin martından iyun ayına qədər davam edəcək. Proqramı uğurla başa vuran iştirakçılar peşə təhsili müəssisələrində direktor və direktor müavini kimi yüksək rəhbər vəzifələrə müraciət etmək imkanı qazanacaqlar. Təlim proqramı liderlik, strateji planlaşdırma və idarəetmə, monitorinq və qiymətləndirmə prosesləri, keyfiyyət təminatı sistemləri, maliyyə və inzibati idarəetmə, peşə təhsili sahəsində mövcud qanunvericilik və strateji sənədlərlə iş daxil olmaqla bir sıra mövzuları əhatə edəcək.
Proqrama martın 26-dək müraciət etmək olar. Namizədlərin pedaqogika, yaxud idarəetmə sahələrində ali təhsil dərəcəsi, peşə təhsili sahəsində beş il iş təcrübəsi, eləcə də Azərbaycan dili və orta səviyyədə ingilis dili biliklərinin olması vacibdir. Seçim prosesi ərizə və müsahibə daxil olmaqla iki mərhələdə olacaq. Təlim proqramı 2 ay ərzində əyani və distant formada təşkil edilən sessiyalarla davam edəcək. Proqramın sonunda sessiyaları uğurla başa vuran namizədlər sertifikat alacaqlar.
Peşəkar təlim proqramı Avropa İttifaqının maliyyələşdirdiyi və BMTİP-nin Peşə Təhsili üzrə Dövlət Agentliyi ilə ortaq şəkildə həyata keçirdiyi “Gələcək üçün peşə təhsili və təlimi: Azərbaycanda qabaqcıl peşə təhsili mərkəzlərinin yaradılmasına dəstək” layihəsi çərçivəsində təşkil edilir. Layihənin əsas məqsədi Azərbaycandakı peşə təhsili müəssisələrini müasirləşdirməyə və əmək bazarının mövcud ehtiyaclarına uyğun səriştə əsaslı tədrisin təşkilinə dəstək olmaqdır.

Tehsil-press.az