“İkinci Qarabağ müharibəsindən sonra işğaldan azad edilən torpaqlarda minaların qurbanına çevrilən azərbaycanlılar üçün dərin kədər hissi keçirirəm”.
Bunu ABŞ-ın tanınmış tədqiqatçı jurnalisti, akademik Thomas Goltz deyib.
O, Azərbaycanın işğaldan azad etdiyi torpaqlarda basdırılan minaların partlaması nəticəsində həlak olan günahsız insanlarla bağlı Beynəlxalq Qırmızı Xaç Komitəsinin paylaşdığı hesabatlara nəzər saldıqdan sonra vəziyyətin nə qədər acınacaqlı olduğunu öyrəndiyini bildirib.
“Gəlin məsələyə iki fərqli prizmadan yanaşaq. Müharibədə döyüşənlər kimlərdir? Mülki əhali nə vaxt minaların hədəfinə çevrilir? İlk sualın cavabı aydındır, amma ikinci suala gəldikdə, bununla bağlı aidiyyəti beynəlxalq təşkilatlar tərəfindən müxtəlif həll yolları təklif olunub: Sistemsiz basdırılmış minaların işarələnməsindən tutmuş, (müharibələrin sonlarına doğru onları geri çıxarmaq şərti ilə) müəyyən müddətdən sonra (2-3 ay) öz-özünü məhv edən “ağıllı mina”lara qədər. Həmin beynəlxalq qurumlar tərəfindən aparılmış araşdırmalar nəticəsində müharibə şəraitində bütün növ minaların basdırılmasına qadağa qoyulması ən qənaətbəxş variant kimi müəyyən edilsə də, bunun yaxın zamanda reallaşmasını gözləmək sadəlövhlük olardı”, - deyə akademik T.Goltz əlavə edib.
Tədqiqatçı jurnalist vurğulayıb ki, ermənilər həmişəki kimi məsuliyyəti öz üzərindən ataraq minaların basdırılmasının və onların yerləşmə xəritələrinin Azərbaycana təhvil verilməsinin Qarabağ ermənilərinin öhdəliyində olduğunu iddia edirlər.
Müharibə zamanı Ermənistan ordusunda müşahidə olunan xaosu nəzərə alan T.Goltz hesab edir ki, minaların basdırıldığı xəritələrin hamısının mövcud olması real görünmür. O, bununla yanaşı bütün hallarda baş verənlərə beynəlxalq hüquq çərçivəsində qiymət verilməsinin zəruriliyini bildirib.

Tehsil-press.az