Azərbaycan Dillər Universitetinin (ADU) nəzdindəki Konfutsi İnstitutu tərəfindən “Çin mifologiyası” silsiləsindən növbəti onlayn seminar keçirilib.
Seminar Çində cənnət imperatriçəsi sayılan Matszuya həsr olunub. Universitetin Çin dili müəllimi, Şərqi Çin Universitetinin magistri Samirə Məmmədova çıxışında Matszu imperatriçəsi bayramının yaranması tarixi barədə məlumat verib. O, Meyçjou adasında Matszunun şərəfinə öz məbədində təşkil olunan yarmarkalar və festivallardan, həmçinin haqqında gəzən əfsanələrdən söz açıb. Qeyd edib ki, bu əfsanələrə görə o, dənizçiləri himayə edən ilahədir, daşqınların və tufanların baş verməsi, eləcə də səngiməsi məhz onun əmri ilə baş verir.
Diqqətə çatdırılıb ki, 1949-cu ildən sonrakı mərhələdə materik Çini və Tayvan arasındakı əlaqələrin bərpasında Matszuya sitayişin mühüm rolu olub.
Seminarda ADU-nun Konfutsi İnstitutunun direktoru Rafiq Abbasov “XXI əsrin Dəniz İpək Yolu”nun qurulmasında Çin strateji konsepsiyasından danışıb. Bildirib ki, iki min il əvvəl olduğu kimi, bu konsepsiya Cənub-Şərqi və Cənubi Asiya arasında, Yaxın Şərqin müsəlman ölkələri arasında ticarət və iqtisadi əlaqələrin daha da inkişafına və ənənəvi dini və mədəni dəyərlər mübadiləsinə, yaxın qonşuluq, aşkarlıq və tolerantlığın gücləndirilməsinə xidmət edəcək.

Tehsil-press.az