“Amerika Birləşmiş Ştatları BMT-nin Nyu-Yorkdakı Baş Qərargahında keçiriləcək tədbirlərdə iştirak edənlərə vizaların verilməsində xüsusi məsuliyyət daşıdığını başa düşür”.
Bu barədə ABŞ Dövlət Departamentinin mətbuat xidmətinin rəhbəri Ned Prays Rusiyanın xarici işlər naziri Sergey Lavrovun BMT Baş Assambleyasının sentyabrda keçiriləcək növbəti sessiyasında iştirak planlarını şərh edərkən deyib.
Prays ABŞ-ın Rusiya nümayəndə heyətinin üzvlərinə, eləcə də şəxsən xarici işlər naziri Sergey Lavrova viza verməyə hazır olduğunu təsdiqləməyib.
Eyni zamanda o, ölkənin Vaşinqtondakı səfiri Anatoli Antonovun departamentə səfəri zamanı viza məsələsini müzakirə etməyə hazırlaşdığını bildirən bəyanatı da şərh etməyib.
Qeyd edək ki, sentyabrın 20-dən 26-dək BMT Baş Assambleyasının 77-ci sessiyası keçiriləcək. Bu il sessiya əvvəlki iki ildən (COVID-19 pandemiyasına görə) fərqli olaraq əyani formatda keçiriləcək.

Tehsil-press.az