Azərbaycan Dövlət İqtisad Universitetində “UNEC-100” İnkişaf Strategiyasında qarşıya qoyulmuş hədəflərə nail olmaq istiqamətində əldə olunan nəticələrin müzakirəsi məqsədilə görülən işlər barədə prorektorların hesabatlarının dinlənilməsinə start verilib.
Prorektor Neman Muradlı İnkişaf Strategiyası üzrə beynəlxalq əməkdaşlıq sahəsində son bir il ərzində görülmüş işlər barədə təqdimatla çıxış edib. Bildirilib ki, UNEC regionda ilk universitet olaraq eyni ildə həm “Erasmus+ Jean Monett”, həm də “Erasmus+ KA2” layihələrinin qalibi olub və 778.000 avro qrant əldə edib. Həmçinin, ilk dəfə “Horizon” proqramı çərçivəsində tərəfdaş qismində iştirak edib. Hazırda isə 7 layihə qrant müsabiqəsi üçün təqdim olunub.
Hesabatda yeni tədris ilində UNEC-də 16 ölkədən 100 nəfər əcnəbi vətəndaşın təhsil hüququ qazandığı, bunun isə son 7 illə müqayisədə 47 faiz çox olduğu bildirilib.
Qeyd olunub ki, “Erasmus+” mübadilə proqramlarında iştirak edən müəllimlərin sayı ötən illərlə müqayisədə 31 faiz, tələbələrin isə 82 faiz artıb.
Prorektor cari ildə 23 xarici ali təhsil müəssisəsi ilə əməkdaşlıq müqaviləsinin imzalandığını deyib. UNEC-də bakalavriat və magistratura pilləsi üzrə xarici universitetlərlə 7 ikili diplom proqramının həyata keçirildiyini, Türkiyənin Ege və Uludağ universitetləri ilə ikili diplom proqramına qısa zamanda start veriləcəyini, digər universitetlərlə isə əməkdaşlığın imzalanma mərhələsində olduğunu vurğulayıb.
UNEC-in beynəlxalq reytinqlərdəki mövqeyi də hesabatda yer alıb. Bildirilib ki, “Vebometrics Reytinqində” (Webometrics Ranking of World Universities) 2022-ci ildə UNEC dünyanın top-5000 universiteti siyahısında 3712-ci yerdə qərarlaşıb. “U-Multirank” reytinqində 549 pillə irəliləyərək 251-300-cü yerləri, Asiya regionu üzrə isə 18-ci yeri tutub. UNEC ilk dəfə “SCimago” reytinqinə daxil olaraq dünya universitetləri sırasında 708-ci, Azərbaycanda isə 1-ci yerdə qərarlaşıb.
N.Muradlı 2023-cü il üçün təyin edilmiş hədəfləri də açıqlayıb.
Hesabat dinlənildikdən sonra rektor professor Ədalət Muradov görülmüş işlərin müsbət nəticələr verdiyini diqqətə çatdırıb, qarşıya qoyulmuş hədəflərə nail olunacağından əminliyi ifadə edib.
Sonra tədbir iştirakçıları müəllim və tələbələrin beynəlxalq mübadilə proqramlarının genişləndirilməsi, xarici universitetlərdən cəlb olunmuş elmi rəhbərlərin sayının artırılması, beynəlxalq reytinqlərdə UNEC-in mövqeyinin gücləndirilməsi və s. istiqamətlərdə təkliflər səsləndiriblər.

Tehsil-press.az