Naxçıvan Dövlət Universitetinin İncəsənət fakültəsinin müəllimi, Prezidentin fərdi təqaüdçüsü, görkəmli tarzən Əkrəm Məmmədlinin 80 illik yubileyi keçirilir

Naxçıvan Dövlət Universitetinin rektoru Elbrus İsayev ustad tarzən, pedaqoq, ictimai xadim, musiqi əsərlərinin müəllifi, tədqiqatçı və Əməkdar mədəniyyət işçisi Əkrəm Məmmədlinin 80 illik yubiley tədbiri çərçivəsində universitetə səfərə gəlmiş Azərbaycanın xalq arstistləri, mədəni-ictimai xadimləri ilə görüş keçirib. Görüşdə Asəf Zeynallı adına Musiqi Kollecinin direktoru, professor, Əməkdar incəsənət xadimi Nazim Kazımov, Azərbaycan Dövlət Filarmoniyası Xalq Çalğı Alətləri Orkestrinin bədii rəhbəri, professor, Xalq artisti Ağaverdi Paşayev, Bakı Musiqi Akademiyasının müəllimi, professor, Əməkdar incəsənət xadimi Arif Əsədullayev, Azərbaycan Milli Konservatoriyasının müəllimləri və Əkrəm Məmmədlinin tələbəsi olan tar ifaçıları iştirak ediblər.

Rektor görüş zamanı universitetin inkişafından bəhs edərək, Prezident İlham Əliyevin "Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı" çərçivəsində görülən işləri diqqətə çatdırıb. Universitetdə yaradılan yeni ixtisaslar, o cümlədən İnformasiya təhlükəsizliyi, Tibb (ingilis dilində tədris), Nanoelektronika və MBA (Səhiyyənin idarə edilməsi) magistratura proqramları haqqında məlumat verilib. Tibb fakültəsində SABAH qruplarının fəaliyyətə başlaması, xarici universitetlərlə əməkdaşlıq protokolları çərçivəsində elmi seminarlar, konfranslar və simpoziumların təşkili xüsusi vurğulanıb.

Həmçinin universitetdə beynəlxalq imtahanların – IELTS və SAT keçirilməsi, universitetin nəzdində yaradılan Cambridge Beynəlxalq Məktəbi və İngilis dili Təmayüllü Gimnaziya, Naxçıvan Dövlət Texniki Kolleci, Tibb Kolleci və Musiqi Kollecinin fəaliyyətinə toxunulub. Bununla yanaşı, universitetdə yaradılan Simfonik Orkestr və keçirilən Caz musiqi tədbirləri, İncəsənət fakültəsi ilə Naxçıvan Musiqi Kollecinin birgə təşkil etdiyi konsertlər də diqqət mərkəzində olub.

Qonaqlar öz çıxışlarında Əkrəm Məmmədlinin yaradıcılıq irsini yüksək qiymətləndirərək, universitetin musiqi sənətinə verdiyi dəstəyi və İncəsənət fakültəsinin uğurlu fəaliyyətini təqdir ediblər. Tədbirdə Əkrəm Məmmədlinin tələbələrindən birinin tarda ifası və universitetin İncəsənət fakültəsi tələbəsinin piano ifası qonaqlar tərəfindən böyük maraqla qarşılanıb.

Görüşün sonunda “Ağ Saray” MTK-nın təsisçisi və rəhbəri Səfər Əliyev, Əkrəm Məmmədlinin sənət yoldaşları və dostları adından rektora yubileyin yüksək səviyyədə təşkilinə görə təşəkkürnamə təqdim edib. Bununla yanaşı, universitet loqosu və “Möminə Xatun türbəsi” təsvir olunmuş xalça hədiyyə edilib.

Yubiley münasibətilə qonaqlar tərəfindən Naxçıvan Dövlət Universitetinin İncəsənət fakültəsinə Belarus istehsalı fortepiano hədiyyə olunub. Rektor Elbrus İsayev bu jesti yüksək qiymətləndirərək, musiqi sənətinə verilən dəyərin bir nümunəsi olduğunu vurğulayıb.

Sonda rektor bildirib ki, Naxçıvan Dövlət Universitetinin xarici universitetlərlə ikitərəfli müqavilələr çərçivəsində əməkdaşlığı, İncəsənət fakültəsinin professor-müəllim heyətinin buraya cəlb olunması və incəsənət sahəsində dəstəyin davam etdirilməsi Azərbaycan mədəniyyətinin inkişafına böyük töhfə verir.