"Təhsildə məsuliyyət – yalnız dərs deməklə bitmir. Bu, həm də qanunlara, etikaya, vətəndaş hüquqlarına hörmətlə yanaşmaq deməkdir".

Bunu təhsil eksperti Kamran Əsədov özünün feysbuk səhifəsində yazıb.

O, təəssüflə bildirib ki, bəzi şəxslər təhsil sistemində vəzifə tutan kimi özlərini qanunlardan üstün görməyə başlayırlar.

"Sanki onların qərarları qanunla yox, şəxsi istəklə ölçülür.

Bu, təkcə idarəçilik problemi deyil. Bu, təhsilin mahiyyətini zədələyən, gənc nəslə verilən mesajı korlayan, cəmiyyətin ədalət hissini sarsıdan təhlükəli bir tendensiyadır. Qanunun tətbiqi fərdlərin kimliyinə görə dəyişirsə, orada hüquqdan yox, özbaşınalıqdan danışmaq olar.

Vəzifədə olanlar unutmamalıdır: təhsil sahəsi cəzasızlıq arenası deyil. Bu sahədəki hər bir qərar yüzlərlə, minlərlə insanın taleyinə toxunur. Məsuliyyətsizlik – gec-tez inamsızlıq, ədalətsizlik və sosial parçalanma ilə nəticələnir. Cəmiyyət isə bunu artıq qəbul etmir. Susmur. Baxışlar dəyişir. Cavab tələb olunur. Hesabat tələb olunur.

Əgər təhsil gələcəyin əsasını qoyursa, o zaman bu əsaslar hüquq, vicdan və məsuliyyət üzərində qurulmalıdır. Başqa yol yoxdur", - deyə o fikrini yekinlaşdırıb.

Tehsil-press.az