Universitetlər cəsarətli təşəbbüslər sərgiləməlidir

Universitetlər cəsarətli təşəbbüslər sərgiləməlidir Asiyanın ən yaxşı universitetlərinin növbəti reytinqi bunu göstərir
Qlobal dünyanın ali təhsil sistemləri qarşısında qoyduğu mühüm şərtlərdən biri universitetlərin çevik təşəbbüslərlə çıxış etməsi, beynəlxalq əməkdaşlıq və elmi tədqiqatlar sahəsində nəticələrə hesablanmış fəaliyyətlərdir.
Bütün bunlar Böyük Britaniyanın təhsil xidmətləri sahəsində nüfuzlu şirkəti olan “The Times Higher Education” (THE) dərgisinın növbəti tədqiqatının mövzusu olub. Mayın 3-də THE 2019-cu il üzrə Asiyanın ən yaxşı ali məktəblərinin reytinq cədvəlini (The Times Higher Education Asia University Rankings 2019) təqdim edib. Bu il reytinq sıralamasına Çinin Tsinxua Universiteti başçılıq edir. Universitet müəllimlərinin elmi məqalələrindən sitatgətirmənin sayının artması, təhsil mühiti, eləcə də beynəlxalq əməkdaşlıq sahəsində fəallığı Tsinxua Universitetinin Asiyada lider mövqeyini təmin edib.
2016-cı ildən bu reytinqdə birinci olan Sinqapurun Milli Universiteti (NSU) bu il ikinci sıraya keçib. Reytinqin təqdimatı zamanı NSU-nun təhsil, tədqiqatlar və sahibkarlığın aparıcı sahələrində uğurlu nəticələrə gətirmiş “cəsarətli təşəbbüsləri” yüksək qiymətləndirilib. Reytinq cədvəlinə əsasən 2-ci yerdə Sinqapur Milli Universiteti, 3-cü yerdə Honkonq Elm və Texnologiyalar Universiteti qərarlaşıb. Bundan əlavə, ən yaxşı 10 universitet arasında Honkonq, Pekin, Tokio, Seul Milli, Nanyanq Texnologiya universitetləri daxil olublar. Beləliklə ilk 10-luğa Asiya regionunun elm və texnologiya sahəsində davamlı liderləri olan Çinin, Cənubi Koreya, Honkonq, Yaponiya, Sinqapurun ali məktəbləri daxil olub. Reytinqin əsasını da bu ölkələr təşkil edir. Bütövlükdə reytinqə Çindən 26 ali məktəb daxil olub. Türkiyənin ən yaxşı universitetlərinə Sabançı Universiteti (36-cı yer) başçılıq edir. Builki reytinq 27 ölkədən 400 ali məktəbi əhatə edir. Qeyd edək ki, Londonda qərarlaşan “Times Higher Education” həftəlik qəzeti 2004-cü ildən universitetlərin reytinqini tərtib edir. Reytinq tərtib olunarkən təhsilin keyfiyyəti, tədqiqat işlərinin səviyyəsi, elmi tədqiqatlardan əldə olunan gəlirlərin həcmi üzrə göstəricilərdən və beynəlxalq fəaliyyətdən istifadə olunub. Bundan əlavə, ali məktəbin akademik və tələbə mühitində, universitet rəhbərləri arasında, eləcə də hökumət səviyyəsində və real sektorda nüfuzu nəzərə alınıb. Tədqiqatla daha ətraflı www.timeshighereducation.com/student/best-universities/best-universities-asia səhifəsindən tanış olmaq olar.

Oruc MUSTAFAYEV


Oxşar xəbərlər