Azərbaycanda təhsilin inkişafı, təhsil sisteminin təkmilləşdirilməsi və beynəlxalq rəqabətə davamlılığının artırılması üçün beynəlmiləlləşməsi statusu önəmlidir.

Bunu xarici işlər nazirinin müavini Yalçın Rəfiyev "Elm və ali təhsilin beynəlmiləlləşməsi" adlı tədbirdə çıxışı zamanı deyib.

Onun sözlərinə görə, bu sahədə ali təhsil müəssisələrinin üzərinə ciddi məsuliyyət və iş düşür:

"Dövlətin təhsil, o cümlədən ali təhsil sahəsinə ayırdığı diqqət və imkanların düzgün reallaşdırılması və təqdim edilməsi ali təhsil müəssisələrinin başlıca vəzifələrindən biridir. Ölkənin inkişafı və gələcəyi üçün zəruri insan kapitalının formalaşdırılması prosesində xüsusi rola sahib olan ali təhsil müəssisələrindən beynəlmiləlləşməsi vasitəsilə keyfiyyət gözləntiləri böyükdür".

Y.Rəfiyev bildirib ki, təhsilin beynəlmiləlləşməsi vasitəsilə keyfiyyətin və beynəlxalq rəqabətə davamlılığın artırılması mümkundür:

"İqtisadi tərəfi ilə yanaşı, məsələ həm də keyfiyyətli və standartlara uyğun yerli kadrların hazırlanması üçün kifayət qədər əhəmiyyətlidir. Xarici İşlər və Elm və Təhsil nazirliklərinin icra etdiyi müxtəlif proqramlar çərçivəsində beş il ərzində 80-dən artıq ölkədən çox sayda tələbə Azərbaycanın ali təhsil müəssisələrində oxumaq imkanı qazanıb. Bu təqaüd proqramları təhsilin beynəlmiləlləşməsi və dünyada tanıdılmasına əhəmiyyətli töhfələr verib".

Tehsil-press.az