Naxçıvan Dövlət Universitetində “Elmi inkişaf: uğurlar və çağırışlar” gənc tədqiqatçıların II Respublika Elmi Konfransı keçirilib. Konfrans Naxçıvan Dövlət Universitetinin İncəsənət fakültəsində baş tutub.Əvvəlcə Vətən uğrunda canlarından keçən şəhidlərimizin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Konfransda rəsmi qurumların, universitetlərin rəhbər heyəti və nümayəndələr, Azərbaycan Milli Elmlər Akademiyası (AMEA), AMEA Naxçıvan Bölməsi, AMEA Z.Bünyadov adına Şərqşünaslıq İnstitutu, AMEA Nəsimi adına Dilçilik İnstitutu, AMEA Folklor İnstitutu, AMEA N.Gəncəvi adına Ədəbiyyat İnstitutu, Azərbaycan Dövlət İqtisad Universiteti, Naxçıvan Müəllimlər İnstitutu, Lənkaran, Gəncə, Sumqayıt Dövlət Universitetlərinin müəllimləri, ölkənin müxtəlif bölgələrindən gənc tədqiqatçılar, magistr, doktorantlar və digər dəvətlilər iştirak ediblər.
Konfransı açıq elan edən Naxçıvan Dövlət Universitetinin rektoru Elbrus İsayev bildirib ki, 2024-cü ildə həyata keçirilən layihələr yalnız universitet üçün deyil, həm də regionun elmi inkişafına, dünya elminə töhfə verməsi baxımından əhəmiyyətli olub və ötən il xüsusilə elmi fəaliyyətdə yaddaqalan uğurlu nəticələr qeydə alınıb. Universitetin əsas prioritetləri sırasında əməkdaşların elmi potensialının artırılmasında elmi dərəcəli əməkdaşların sayı artaraq 229 nəfərə çatıb.
Rektor Elbrus İsayev qeyd edib ki, universitetində tək bu gün deyil ötən 5 illə müqayisədə akademik heyətdə elmi dərəcəlilərin sayında müsbət artım dinamikası izlənilir. Belə ki, 2020-ci ildə heyətdə elmi dərəcəlilərin sayı 34% olmuşdursa, hazırda bu 40.3%-dir. Ötən illə müqayisədə universitetdə əməkdaşların sayı 10%-dək artıb ki, bunun da orta hesabla 50%-i elmi dərəcəlilər təşkil edir. Heyətdə elmlər doktorlarının sayı 2020-ci illə müqayisədə orta hesabla 1,5 dəfə artıb. Rektor əlavə edib ki, 2020-ci illə müqayisədə elmi adlı heyətdə 78% artım olub. Akademik heyətə düşən nəşr sayı 2020-ci illə müqayisədə bir əməkdaşa düşən nəşr sayı 3.4 dəfə artıb və universitet tarixindəki ən yüksək nəticə qeydə alınıb. 2020-ci ildə universitet üzrə cəmi 13 konfrans keçirilmişdirsə, 2024-cü ildə təkcə Beynəlxalq konqres və simpoziumların sayı bundan çox olub. 2024-cü ildə NDU alimlərinin Scopusda indekslənmiş məqalələrinin sayı 2023-cü illə müqayisədə 5 dəfə, Web of Science-də indeksləşmiş nəşr sayı da 2 dəfə artıb. Eyni zamanda 2024-cü ildə universitetdə 73 elmi tədbir, 14 beynəlxalq, 12 respublika konfransı keçirilib. Həmçinin Universitetin Elmi Kitabxanasının fondu daim zənginləşdirlib ki, hazırda 180 minə yaxın resurs var. Rektor Elbrus İsayev xüsusilə elmin və elmi biliklərin populyarlaşdırılması və təbliğində KİV-in rolundan söz açaraq jurnalistikanın vacib sahələrindən biri olan elmi jurnalistikanın inkişafının diqqətdə olacağını bildirib.
AMEA Naxçıvan Bölməsinin sədri İsmayıl Hacıyev AMEA-nın inkişaf yolundan bəhs edib, elmin dövlətin davamlı sosial-iqtisadi və mədəni inkişafında mühüm rolu barədə məlumatları diqqətə çatdırıb. İsmayıl Hacıyev qeyd edib ki, ölkəmizdə elmin inkişafı dövlət siyasətinin əsas prioritetlərindən biridir. “Azərbaycan Respublikasında 2009-2015-ci illərdə elmin inkişafı üzrə Milli Strategiya”, “Elm haqqında” qanun bu yöndə inkişaf istiqamətlərini özündə əks etdirir. Naxçıvan Dövlət Universitetində də bu istiqamətlər əsaslı elmin inkişafı yönündə davamlı tədbirlər həyata keçirilir və konfrans da özlüyündə bu tədbirlərə nümunədir.
Azərbaycan Dövlət İqtisad Universiteti, Elmi fəaliyyətin təşkili və idarə edilməsi departamentinin direktoru Zahid Məmmədov çıxış edib, Naxçıvan Dövlət Universitetinin çox sürətli və uğurlu inkişaf yolu keçdiyini vurğulayıb. Bu yüksəlişin keyfiyyətli kadr potensialı, xüsusi ilə rektor Elbrus İsayevin müsbət reputasiyası ilə bağlı olduğunu ifadə edən Zahid Məmmədov konfransın təşkilini çox yüksək qiymətləndirib. Bildirib ki, bu gün Naxçıvan Dövlət Universiteti öz fəaliyyəti ilə dünya elm ictimaiyyətində çox ciddi diqqət çəkir. Nobel mükafatçısı Əziz Səncərin ötən il NDU-nə gəlməsi və universitet haqqında səsləndirdiyi fikirlər buna bariz nümunədir. Zahid Məmmədov eyni zamanda Universitetlərin missiyası yönünü təyin edən elmi tədqiqat, beynəlxalq rəqabət qabiliyyətlilik, elmi nəşrlərdə istinad indeksi, biliklərin kommersiyalaşdırılması, akademik bacarıqlar və digər kateqoriyalar barədə məlumatlar verib. Qeyd edib ki, bu gün ölkədə ali təhsil müəssisələrində Elmi tədqiqatların nəticələri diqqətdə saxlanılmalı və bütün tədqiqatlar ölkənin, milli iqtisadiyyatın inkişafına inkişafına xidmət etməlidir.
Acıbadem Xəstəxanasının Ürək-Damar klinikasının qurucusu, professor Cem Alhan konfransın mahiyyəti haqqında fikirlərini bölüşüb. NDU və Naxçıvanda ilk dəfə olması ilə bağlı təəssüratlarını ifadə edib. Xüsusilə Naxçıvanın coğrafi mövqeyi və mövcud blokada vəziyyəti ilə bağlı fikirlərində Naxçıvan Dövlət Universitetinin elmi nailiyyətləri ilə blokadanı aşdığını qeyd edib.
NDU Magistratura və doktorantura mərkəzinin direktoru Çapay Quliyev Naxçıvan Dövlət Universitetində elmi-pedaqoji kadrların hazırlanması istiqamətində magistratura və doktorantura səviyyələri üzrə həyata keçirilən tədbirlər və əldə olunan nəticələr barədə məlumat verib.
Daha sonra gənc tədqiqatçılar Naxçıvan Dövlət Universitetinin magistrantı Mirməhəmməd Seyidzadə “Proqramlaşdırmada təhlükəsiz data analitika”, Bitki Mühafizə və Texniki Bitkilər Elmi Tədqiqat İnsitutu doktorantı Jalə Hüseynzadə “Qlobal iqlim dəyişikliyinin tütün ağ milçəyi zərərvericisinə təsiri”, Naxçıvan Dövlət Universiteti magistrantı Kamal Allahverdiyev “Naxçıvanda meliorasiya sistemlərinin inkişafı və dron texnologiyalarının tətbiqi” mövzularında məruzələr ilə çıxış ediblər.
Konfrans universitetin Fizika-riyaziyyat, Beynəlxalq münasibətlər və hüquq fakültəsində bölmə iclasları ilə öz işini davam etdirib.
Qeyd edək ki, konfrans 03-04 aprel tarixləri olmaqla iki gün ərzində 12 salonda keçiriləcək, 63 paneldə hibrid formada bölmə iclasları ilə davam edəcək. Respublika üzrə 50 müəssisədən 700 dən çox tədqiqatçı tərəfindən təqdim edilən 600-dək elmi təqdimat müzakirə olunacaq.
Tehsil-press.az
