Tarix bəzən bir an içində böyük həqiqətləri üzə çıxarır. Oktyabrın 9-da Tacikistanın paytaxtı Düşənbədə baş tutan görüş - Prezident İlham Əliyevlə Rusiya Prezidenti Vladimir Putinin təkbətək söhbəti məhz belə anlardan biri idi. Bu görüş təkcə iki ölkə arasındakı diplomatik əlaqələrin epizodu deyil, həm də müasir beynəlxalq münasibətlər sistemində Azərbaycan Prezidentinin siyasi qətiyyəti, dövlətçilik iradəsi və mənəvi ucalığının parlaq təcəssümü idi. Görüşün ən diqqətçəkən məqamı - bəlkə də son illərin ən mühüm siyasi hadisəsi Vladimir Putinin Azərbaycanın dövlət başçısından və Azərbaycan xalqından rəsmi şəkildə üzr istəməsini deməsi oldu. Bəli, Rusiya kimi nəhəng dövlətin rəhbəri, dünya siyasətinin aparıcı fiqurlarından biri Prezident İlham Əliyevin qarşısında səmimi şəkildə üzrxahlıq etdi. Bu, sadəcə, diplomatik jest deyil, həm də Azərbaycan diplomatiyasının, Prezident İlham Əliyev məktəbinin, milli qürurun və beynəlxalq hüququn tarixi qələbəsidir. Rusiya Prezidenti faciəvi aviaqəza ilə bağlı bütün detalları şəxsən təqdim edərək istintaqın nəticələrini açıqladı, məsuliyyəti açıq şəkildə öz üzərinə götürdü. Bu görüş bir daha sübut etdi ki, Prezident İlham Əliyev təkcə Azərbaycan dövlətinin deyil, bütövlükdə regionun ən güclü və düşünülmüş siyasət yürüdən Lideridir. Onun çıxışında sərgilədiyi təmkin, siyasi etika və eyni zamanda, dəmir məntiq bir daha göstərdi ki, Ulu Öndər Heydər Əliyev məktəbi bu gün Prezident İlham Əliyevin simasında yeni zirvələrə yüksəlib.

Bu sözləri açıqlamasında beynəlxalq hüquq üzrə ekspert Kəramət Qənbərov söyləyib.

O bildirib ki, Prezident İlham Əliyev dahi dövlət xadimi Ümummilli Lider Heydər Əliyevin ideyalarının canlı daşıyıcısı, onun dövlətçilik fəlsəfəsinin müasir dövrdə parlaq davamçısıdır. Atası kimi, o da yalnız siyasət yürütmür, siyasət yaradır, istiqamət müəyyənləşdirir, reallıqları dəyişir. Dövlətimizin başçısının rəhbərliyi ilə Azərbaycan təkcə regionun deyil, beynəlxalq aləmin söz sahibi olan, iradəli və prinsipial mövqeyi ilə hörmət qazanan bir dövlətə çevrilib. Prezident İlham Əliyevin çıxışında ən təsirli məqamlardan biri onun faciə qurbanlarına və ailələrinə yönələn humanist münasibəti idi. O, hadisəni insanlıq faciəsi kimi qiymətləndirdi və məsələni hər zaman diqqət mərkəzində saxladığını vurğuladı. Bu, dövlətimizin başçısının təkcə siyasi xadim deyil, insanlığa, mərhəmətə və mənəvi dəyərlərə sadiq bir Lider olduğunu göstərdi. Humanizm Prezident İlham Əliyevin siyasətində, sadəcə, bir anlayış deyil, yol xəritəsidir. O, insan həyatını, ailəni, ədaləti və şəffaflığı hər şeydən üstün tutur. Bu da onu dünyanın bir çox siyasi liderlərindən fərqləndirən əsas xüsusiyyətdir.

Ekspertin sözlərinə görə, görüşün digər vacib istiqaməti iqtisadi-ticari münasibətlərin genişləndirilməsi idi. Rusiya Prezidenti qeyd etdi ki, iki ölkə arasında ticarət dövriyyəsi ötən il 6 faiz, bu il isə 16 faizdən çox artıb. Bu fakt Azərbaycanın iqtisadi diplomatiyasının səmərəliliyini və dövlətimizin başçısının xarici siyasətinin çoxşaxəli inkişaf modelini bir daha təsdiqləyir. Prezident İlham Əliyev isə cavab çıxışında bu münasibətlərin təkcə iqtisadi sahədə deyil, bütün istiqamətlərdə uğurla inkişaf etdiyini vurğuladı. Azərbaycan-Rusiya münasibətləri bu gün qarşılıqlı etimad, hörmət və strateji tərəfdaşlıq üzərində qurulub. Azərbaycan bu gün regionun enerji, logistika və təhlükəsizlik sahələrində mərkəzi güc mərkəzinə çevrilib.

“Tarixi görüşün ən böyük mənası ondan ibarətdir ki, Azərbaycan bu gün artıq heç kimin “kiçik tərəfdaşı” deyil. Azərbaycan bərabərhüquqlu, güclü və prinsipial dövlət kimi hər bir beynəlxalq müzakirədə öz sözünü deyir, ədaləti bərqərar edir. Rusiya kimi nəhəng bir güc mərkəzinin rəhbəri də Prezident İlham Əliyevin siyasi iradəsi qarşısında səmimi üzrxahlıq edir, məsuliyyət daşıyırsa, deməli, Azərbaycan diplomatiyası artıq təkcə regionda deyil, qlobal miqyasda da nüfuz amilinə çevrilib. Düşənbə görüşü bir daha göstərdi ki, Azərbaycan Prezidenti İlham Əliyev müasir dünyanın ən balanslı, lakin ən güclü liderlərindən biridir. O, hər bir hadisəyə ağıl, təmkin, ədalət və mərhəmətlə yanaşır, amma, eyni zamanda, dövlət maraqları məsələsində dəmir iradə nümayiş etdirir. Vladimir Putinin üzrxahlığı, sadəcə, bir hadisə deyil, bu, Azərbaycan Prezidentinin beynəlxalq aləmdə qazandığı mənəvi və siyasi qələbənin rəsmi etirafıdır. Dünya mediası bu görüşü geniş işıqlandırdı və Düşənbədə yazılan bu tarix bir daha göstərdi: Azərbaycanın səsi artıq təkcə Qafqazda deyil, dünyanın hər yerində eşidilir”, - deyə K.Qənbərov əlavə edib.

Tehsil-press.az