Belarus prezidenti Aleksandr Lukaşenko Rusiya Müdafiə Nazirliyinə məxsus Tu-154 təyyarəsinin qəzaya uğraması ilə əlaqədar ölkədə 26 dekabr tarixində matəm elan edib.

Tehsil-press.az-ın məlumatına görə, bu barədə Belarus liderinin mətbuat xidmətindən bildirilib.
Lukaşenkonun sözlərinə görə, təyyarənin qəzaya düşməsi ilə bağlı xəbərə bütün belaruslar biganə qalmayıblar.
"Bu, faciədir, bizim ümumi ağrımızdır və Belarus bu gün Rusiya ilə birlikdə kədərlidir. Bu çətin dəqiqələrdə biz kədərimizi paylaşırıq", - A. Lukaşenkonun rusiyalı həmkarı Vladimir Putinə ünvanladığı başsağlığı məktubunda bildirilir.
Belarus dövlət başçısının tapşırığına əsasən, 26 dekabrda prezident iqamətgahının qarşısında və bütün digər dövlət qurumlarının binası önündəki dövlət bayraqları endiriləcək, şou və əyləncə tipli verilişlərin yayımı dayandırılacaq.
Qeyd edək ki, Rusiyanın Müdafiə Nazirliyinə məxsus Tu-154 təyyarəsi bu gün havaya qalxdıqdan 20 dəqiqə sonra radarlardan itib. Onun göyərtəsində 83 sərnişin və 8 ekipaj üzvünün olduğu deyilir.

Tehsil-press.az