Bakı Dövlət Universiteti (BDU) ilə Əmlak Məsələləri Dövlət Komitəsi yanında Daşınmaz Əmlakın Kadastrı və Ünvan Reyestri Xidməti arasında anlaşma memorandumu imzalanıb. İmzalanma marasimindən əvvəl BDU-nun Tədrisin təşkili və təlim texnologiyaları üzrə prorektoru, professor İradə Əliyeva memorandumun hər iki tərəf üçün səmərəli olacağını deyib. Xidmətin rəisi Ramiz Quliyev rəhbərlik etdiyi qurumun fəaliyyəti barədə məlumat verərək, qurumun Azərbaycan təhsilinin flaqmanı olan BDU-nun yetişdirdiyi gənc kadrlara ehtiyacı olduğunu, universitet ilə əməkdaşlıqda maraqlı olduqlarını bildlrib.
Memorandumda tərəflər birgə kadr hazırlığı, istehsalat-çöl təcrübələrinin keçirilməsi, elmi-tədqiqat işləri və istehsalatın elmi əsaslarla təşkili sahəsində birgə fəaliyyət üzrə razılığa gəliblər. Memorandumum imzalanmasında məqsəd BDU-da tədris prosesinin istehsalatla əlaqələndirilməsi, elm-təhsil-istehsalat arasında inteqrasiyanın gücləndirilməsi, tələbə və magistrantlarda tədqiqatçılıq və peşə fəaliyyəti üçün zəruri olan praktiki bilik, bacarıq və vərdişlərin formalaşdırılması, “Yerquruluşu, torpaq və şəhər kadastrı” və “Torpaqşünaslıq və aqrokimya” ixtisasları sahəsində istehsalat, elmi yeniliklər və innovasiyaların tədris prosesinə cəlb edilməsi, birgə elmi tədqiqatların aparılmasıdır.

Mətbuat və informasiya şöbəsi