Ötən il Azərbaycanda ov qaydalarını pozan 20 əcnəbi şəxs cəzalandırılıb və hər biri 2 min manat məbləğində cərimə olunublar. Bunu Ekologiya və Təbii Sərvətlər Nazirliyinin Dövlət Ekoloji Təhlükəsizlik Xidmətinin rəisi Hikmət Əlizadə bildirib.
Onun sözlərinə görə, həmin şəxslərin əksəriyyəti ölkə qanunvericiliyini pozduğuna görə, məcburi şəkildə ölkədən çıxarılıblar. 2018-ci ildə isə 16 əcnəbiyə qarşı belə cəza tətbiq olunub.
H. Əlizadə həmçinin əhalinin xarici ovçuların Azərbaycanda ov etməsinə qısqanc yanaşdığını söyləyib: “Sual olunur ki, ərəblər ölkəmizdə həmişə ov edirlər, buna necə nail olurlar? Bizdə əhali xarici ovçuların Azərbaycanda ov etməsinə qısqanc yanaşır. Əslində bunu anlayışla qarşılamaq lazımdır. Əcnəbilərin ovu konstitusiyadan irəli gəlir, bir sıra hüquqlar, o cümlədən ovçuluq vətəndaşlığından asılı olmayaraq hamıya şamil edilir. Amma bu o demək deyil ki, əcnəbilər ölkəmizdə həmişə ov edirlər. Məsələn, karantin dövründə ölkələrə giriş-çıxış olmayıb, hansısa vətəndaşın gəlib burada ov etməsi absurddur”.
H. Əlizadə vurğulayıb ki, vətəndaşlığından asılı olmayaraq hər kəs qanun qarşısında bərabərdir və qanunu pozanların qarşısı alınacaq.
Tehsil-press.az
