Azərbaycan Beynəlxalq Bankının keçmiş rəhbəri Cahangir Hacıyevin həyat yoldaşı Zamirə Hacıyeva 22 milyon funt-sterlinq müsadirə qərarı ilə bağlı apelyasiya şikayəti üzrə məhkəməni uduzub.
Bu barədə “Daily Mail” nəşri yazıb. Bildirilib ki, Hacıyeva Naytsbricdəki bir ev və Berkşirdəki bir qolf sahəsi almaq üçün xərclədiyi vəsaitin mənbəyini izah edə bilməyib.
Harrods yaxınlığındakı malikanə isə 2009-cu ildə Britaniyanın Virgin adalarında qeydiyyatdan keçmiş bir şirkət tərəfindən 11,5 milyon funt sterlinqə alınıb.
“Hacıyevanın qərardan şikayət vermək üçün başqa yolu yoxdur. İndi o, bu sərvəti ilə əlaqədar tələb olunan məlumatları təqdim etməli olacaq”,- deyə qəzet yazır.
Qeyd edək ki, 2018-ci ildə Zamirə Hacıyevanın 2006-2016-cı illər arasında bir gündə 600.000 funt sterlinq də daxil olmaqla, dəbdəbəli Harrods ticarət mərkəzində ümumilikdə 16 milyon funtdan çox pul xərclədiyi məlum olub. O, fevralda İngiltərənin Milli Cinayət Agentliyinin qanuni fəaliyyət göstərdiyini təsbit edən Apellyasiya Məhkəməsinin qərarını inkar edə bilməyib.
Məhkəmə hakimi Bernett və digər iki yüksək dərəcəli hakim tərəfindən o zaman verilən qərarda belə qeyd olunub: “Cənab Hacıyevin dövlət məmuru olduğuna dair dəlillər var idi və çətin ki, onun qanuni gəlirləri xərclənən vəsaitlərin əldə olunması üçün kifayət edirdi”.

Tehsil-press.az