2020-2021-ci tədris ilində icma əsaslı məktəbəqədər təhsil qrupları ölkə üzrə 50 rayon və şəhərdə təşkil edilib.
Ümumi sayı 500-ə çatan bu qruplardakı 9 min 207 nəfər 3-4 yaşlı uşaqla 486 tərbiyəçi-müəllim çalışır.
Qeyd edək ki, cari tədris ilindən “İcma əsaslı məktəbəqədər təhsilin inkişafı” layihəsinin rəsmi saytı (www.icmalayihesi.edu.az) istifadəyə verilib. Saytda layihə, keçirilən təlimlər, müəllim və uşaqların qəbulu, məktəbəqədər təhsil barəsində ətraflı məlumatlar yer alır. Layihənin rəsmi “Facebook” səhifəsi də (https://www.facebook.com/ieutm) aktivdir. Layihə çərçivəsində valideynlərin uşaqların məktəbəqədər dövrünə dair müxtəlif mövzularda maarifləndirilməsi məqsədilə “ilk5il” internet səhifəsi və mobil tətbiqi də fəaliyyət göstərir.
Bu qruplardakı tərbiyəçi-müəllimlərin iş keyfiyyəti və mərkəzin ümumi texniki infrastrukturunun monitorinqi üçün 21 mentor çalışır. Mentorlar qruplarda tədris prosesi ilə yaxından tanış olur və tərbiyəçi-müəllimlərə lazımi dəstək göstərirlər.
Mövcud pandemiya şəraiti ilə əlaqədar tərbiyəçi-müəllimlərin peşəkar inkişafı vebinar və videotəlimlər vasitəsilə həyata keçirilir. İndiyədək təşkil edilən vebinar və videotəlimlər əsasən “Oyun uşaq şəxsiyyətinin inkişafında aparıcı fəaliyyət kimi”, “Tərbiyəçilərlə valideynlər arasında ünsiyyətin xüsusiyyətləri”, “Məktəbəqədər yaşda olan uşaqların sosial-psixoloji adaptasiyası”, “Uşaqlarda erkən inkişafın qiymətləndirilməsi”, “Uşaqlarda düzgün oxu vərdişləri necə formalaşdırılmalıdır?” və digər bu kimi mövzuları əhatə edib.

Tehsil-press.az