Azərbaycan İlahiyyat İnstitutunun (Aİİ) rektoru Aqil Şirinov “Nur-Mübarək” Misir İslam Mədəniyyəti Universitetinin təşkilatçılığı və Qazaxıstan Müsəlmanları Ruhani İdarəsinin dəstəyi ilə Almatı şəhərində keçirilən beynəlxalq elmi-praktik konfransda onlayn iştirak edib.
“Milli-mənəvi birliyin möhkəmlənməsində dini təhsilin rolu” mövzusunda təşkil olunan beynəlxalq elmi-praktik konfrans Qazaxıstan Respublikasının müstəqillik qazanmasının 30, ölkədə fəaliyyət göstərən “Nur-Mübarək” Misir İslam Mədəniyyəti Universitetinin yaranmasının 20 illiyinə həsr olunub.
İlahiyyat İnstitutunun rektoru Aqil Şirinov konfransda məruzə ilə çıxış edib. Bildirib ki, dini təhsil istər dinin əsas prinsiplərinin doğru şəkildə cəmiyyətə çatdırılması, istərsə də dövlət təhlükəsizliyi baxımından böyük əhəmiyyət kəsb edir. Belə ki, dəyərlər sistemi olaraq din cəmiyyətin mənəvi inkişafında və ictimai birliyin təminində əvəzsiz rola malikdir.
Ölkəmizdə ali dini təhsil verən yeganə müəssisə olan Azərbaycan İlahiyyat İnstitutu haqqında məlumat verən rektor yüksək elmi təfəkkürə malik, milli-mədəni irsi anlayıb dəyərləndirə bilən, mövcud problemlərə dair həll yolları irəli sürən, ilahiyyat sahəsində əsas biliklərə yiyələnən kadrlar hazırlamağı qarşısına məqsəd qoyduğunu vurğulayıb.

Tehsil-press.az