Azərbaycan Dövlət İqtisad Universitetində (UNEC) ali təhsilin doktorantura pilləsi üzrə təşkilinin təkmilləşdirilməsi məqsədilə müzakirələr aparılıb.
UNEC-in rektoru professor Ədalət Muradovun və müvafiq struktur rəhbərlərinin iştirakı ilə keçirilən görüşdə Beynəlxalq Magistratura və Doktorantura Mərkəzinin direktoru dosent Fariz Əhmədov təqdimatla çıxış edib.
F.Əhmədov doktorantura təhsilinin təşkili istiqamətində görülmüş işlər, qəbul prosesi və qarşıda duran məsələlər barədə məlumat verib. O, hazırda 14 doktorantın Türkiyənin İstanbul Universitetində təhsil aldığını, cari ildə isə əlavə olaraq 8 doktoranta xaricdə təhsil üçün UNEC-in razılıq məktubu verildiyini diqqətə çatdırıb. Təqdimatda doktorantura təhsilinin mövcud problemləri və onların həlli ilə bağlı təkliflər də səsləndirilib.
Sonra UNEC-də doktorantura təhsilinin mövcud durumu barədə müzakirələr aparılıb, təkliflər dinlənilib.
Doktorantura təhsilində yeni modelin qurulmasının tələb olunduğu, bu istiqamətdə UNEC mütəxəssislərinin əsaslandırılmış baxışının mövcud olduğu bildirilib.

Tehsil-press.az