Bu vaxtadək İtaliya ərazisinə Liviyadan olan minədək qaçqın və sığınacaq axtaran şəxs təxliyə edilib.
İtaliyanın Daxili İşlər Nazirliyinin məlumatına görə, 2017-ci ildən bəri ölkəyə Liviyadan olan 997 qaçqın və sığınacaq axtaran şəxs təxliyə olunub. Onlardan 95-i həssas qrupa aid olan şəxslərdir.
2021-ci ilin aprelində Birləşmiş Millətlər Təşkilatının Qaçqınlar üzrə Ali Komissarlığı (BMT QAK) ilə imzalanmış protokolun icrası çərçivəsində ümumilikdə 500 nəfəri əhatə edən humanitar dəhlizlər yaradılıb.
Qeyd edək ki, BMT QAK 2017-ci ildən indiyədək Liviyadan 6145 qaçqını və sığınacaq axtaran şəxsi təxliyə edib. Liviya hakimiyyətinin humanitar uçuşlara qadağası səbəbindən birillik fasilədən sonra təxliyələr 2021-ci ilin noyabrında bərpa edilib.
BMT QAK hesab edir ki, 2023-cü ildə qlobal miqyasda 2 milyondan çox qaçqın köçürülməyə ehtiyac duyacaq. Bu, 1,47 milyon insanı əhatə edən 2022-ci ildəki göstərici ilə müqayisədə 36 faiz artım deməkdir.

Tehsil-press.az