Azərbaycan Dövlət İqtisad Universitetinin (UNEC) 1973-cü il məzunları 50 ildən sonra təhsil aldıqları universitetdə bir araya gəliblər.
Məzunlar əvvəlcə universitetin şəhid məzun və tələbələrinin xatirəsinə ucaldılan Memorial-xatirə kompleksini ziyarət edərək, önünə gül dəstələri düzüblər, onların əziz xatirəsini ehtiramla yad ediblər.
Sonra universitetin 24/7 kitabxanası, müasir texniki avadanlıqla təchiz olunmuş auditoriyaları və Yunus Mərkəzi ilə tanış olublar.
Elm üzrə prorektor professor Sakit Yaqubov, Maliyyə və audit kafedrasının müdiri professor Əvəz Ələkbərov 50 il öncəki tələbə yoldaşlarını universitetdə görməkdən böyük sevinc hissi keçirdiklərini bildiriblər. Vaxtilə onlarla bir qrupda təhsil alan gənclərin əksəriyyətinin ölkənin bir sıra dövlət qurumlarında məsul vəzifələrdə çalışdıqlarını, eyni zamanda, dövlətimizin tərəqqisinə töhfələr qazandırmış bacarıqlı və peşəkar kadrlar olduqlarını vurğulayıblar.
Rəqəmsallaşma üzrə prorektor, UNEC Məzunları Assosiasiyasının idarə heyətinin sədri dosent Raqif Qasımov məzunların universitetdə görüşməsini müsbət ənənə kimi qiymətləndirərək, bu ənənənin davam etdirilməsinin əhəmiyyətini vurğulayıb.
Karyera mərkəzinin rəhbəri Aytac Rzayevanın moderatorluğu ilə keçirilən tədbirdə Maliyyə və mühasibat fakültəsinin dekanı dosent Hafis Hacıyev məzunlara universitetdəki yeniliklər və qazanılan uğurlar barədə məlumat verib.
Sonra məzunlar tələbəlik illəri barədə xatirələrini bölüşüblər. Bu ali məktəbin böyük uğurlara imza atmasından qürur duyduqlarını ifadə edən məzunlar göstərilən diqqətə görə təhsil müəssisəsinin rəhbərliyinə təşəkkürlərini bildiriblər, universitetə xatirə hədiyyəsi təqdim ediblər.

Tehsil-press.az