Türkiyə ilə İraq arasında enerji nazirləri səviyyəsində keçirilən görüşdə boru kəmərindən ixracın bərpası ilə bağlı danışıqların davam etdirilməsi qərara alınıb.
İraqın neft naziri Hayan Abdel-Qani və türkiyəli həmkarı Alparslan Bayraktar Şimali İraqdan çıxarılan neftin Kərkük-Ceyhan boru kəməri ilə ixracının bərpası üçün qısa müddətdə razılığa gələ bilməsələr də, danışıqların davam etdiriləcəyini bildiriblər.
Beynəlxalq Arbitraj Məhkəməsi İraq mərkəzi hökumətinin razılığı olmadan İraq Kürd Regional Rəhbərliyinə neft ixracına icazə verdiyinə görə Türkiyəni təzminatla cəzalandırıb. Türkiyə martın 25-də Kərkük-Ceyhan xəttində daşınmanı dayandırıb. Daşımanın dayandırılması İraq Kürd Regional Rəhbərliyindəki yataqlardan dünya bazarlarına neft ixracının dayandırılmasına səbəb olub.
İraq Neft Nazirliyindəki mənbənin verdiyi məlumata görə, Ceyhandan neft ixracının bərpası, eləcə də müxtəlif məsələlərin müzakirə olunduğu görüşdən sonra açıqlama verilib. Açıqlamada boru kəmərində təmir işlərinin yenidən daşınmaya başlamazdan əvvəl tamamlanmasının gözlənildiyi bildirilib.
İraqın şimalında çıxarılan neftin idarə edilməsi ilə tanış olan nazirlik rəsmisinin sözlərinə görə, Ankara ötən ay İraqın dövlət neft ixracat şirkəti SOMO ilə əlaqə saxlayıb və boru kəməri yenidən açılana qədər texniki baxışın tamamlanmalı olduğunu bildirib.
İraqın energetika rəsmiləri bəyan ediblər ki, neft naziri Kərkük-Ceyhan vasitəsilə ixracın bərpası üçün dəqiq tarix müəyyən etmək üçün Ankara ilə ortaq əsasda görüşməyə çalışır.

Tehsil-press.az